من اجل امى

من اجل امى حاولت ان اكتب كلمة تخرج مبارك من حياتنا بكرامة
حاولت ان اقول انه رحل رجلا و لكننى تذكر كلابه ممن قتل و روع و شرد
حاولت ان اقول انه كان له رؤية و لكننى تذكرت تباتته و حركته البطيئة و فشله فى قراءة مطالب الشعب
حاولت و حاولت و لم استطع
سامحينى يا امى فقد حاولت و لكننى لم و لن استطيع ان اودعه كرجل او كبطل فقد فعل بنا الكثير
سامحينى

طارق المملوك
يوم التنحى الحادى عشر من فبراير 2011

قصيدة - و جالك يوم

وجالك يوم

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه ؟؟!!..

ما ادبتيش عيالك ليه؟؟!!..

ما حرمتيش .. تيجيبى عيال ؟؟!!..

لا جاى اشمت ولا اعايرك ..

ده انا خجلان وانا جايلك ..

ده انا ولدك .. انا شايلك ..

فى ننى عيونى من جوه..

وفاردلك قلوع الشوق .. بعزيكى ..

يا بختى لما ابكيكى و ابكيكى ..

ولا يشمتك عدو فيكى ..

آدى طرحك .. وآدى حالك و دى نفسك ..

آدى عيالك .. و ده خلفك ..

منيش مستنى اعذارك .. ولا اسفك ..

وحسرة قلبك الدبلان .. على سلفك ..

شوفى عيالك ..

ده واعدك لما يتعافى ياخد يدك .. وراح و ماجاش ..

وده حلفلك يمين الله يصون عهدك .. و ما وفَاش ..

و ده قالك .. اموت فيكى .ز و اعيش فيكى .. وماستناش ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه .. اصول اصلك ؟؟!!..

ما ادبتيش عيالك ليه .. و كبرتيلنا رجاله .. تصون عرضك ؟؟!!..

ولا تقولى نصيب مكتوب ولا قسمه ..

عيالك لما عوزتيهم .. يا غالية باعوكى ف الازمه ..

ما ادبتيش عيالك ليه؟؟!!.. يحاوطوكى ف وقت الشده و الازمه ..

وكبرتى ف عيالك ليه .. دبيب الخوف من الجزمة ..

كلام متعاد مالوش عازه .. ولا لازمه ..

كلام ف معاده متاخر .. لا هايقدم ولا ياخر ..

لكن عاتب على يأسك و متحسر ..

بنيتى تحت رمل الارض .. ليه قبرك .. وده هرمك ..

وطمعتى الخسيس فى اللقمه من بوقك .. عشان كرمك ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما أدبتيش عيالك ليه ؟؟!!..

وجايه تلومى سجانك ؟؟!!..

وجايه تموتى من تانى .. فدا عيالك ؟؟!!..

ما علمتيش عيالك ليه ..كلام ناسك .. و علمتيهم الفاضية ؟؟!!..

و هننتى بكلام ماسخ .. و كنتى بتضحكى و راضية ..

كبيرهم لما كبَرهم .. قوام داسك ..

و لما صغيرهم اتفرعن .. حنا راسك ..

بيقيتى لوحدك الملعونة من اهلك .. و حراسك ..

ده ياما قلتلك و بكيت ..

وياما نصحت من قلبى ولا مليت ..

كرهتينى .. و قلتيلى : " واكل ناسك" ..

وانا علمك .. وانا شيخك .. وانا ناسك ..

طردتينى و بعتينى .. وودعتينى بمداسك ..

" تحس منين .. ببسمه من ضنا غالى؟؟..

وبتغير ليه ؟؟ بدلع وادى من مالى "..

وادينى مشيت .. وفاكره ف يوم سليت و نسيت ..

وادينى غبت و اتغميت ..

ما عدت بشوف ولا بسمع .. وده حالى ..

و صورتك لسه قدامى ..

بعيد الكلمة لما بشوف ف احوالك .. و احوالى ..

*****

مسير الغم ده يعدى ..

تزيحى الهم من قلبك .. ييجى عندى ..

تعالى فى حضنى و ابكى دموع .. ولا تعاندى ..

ده انا راجلك .. انا سندك ..

انا اللى فى يوم ماهاتميلى هاقوم ساندك ..

انا قلبك .. انا صلبك ..

وبدنى يدوب قدا بدنك ..

وانا وعدك .. الاقيكى ف يوم واعدك ..

وجايلك يوم .. اقولك فيه .. يجيلك يوم ..

و سجانك يصير فارس ف حراسك ..

ويجيى من بعيد ناسك

يبوسوا ايدكى و يرفعوا فى العُلا .. راسك

تسامحينا .. تلمينا ..

فى حضنك يا احن الخلق تطوينا..

تعدى سنين و تيجى سنين ولا تشيخى ..

وزى ما قالى يوم شيخى ..

دى محروسة بميت بركة .. من دعا الصالحين ..

يشقشق من بعيد بكرة .. واكونلك فيه .. منارة نور ..

وفوق شجرك .. ازقزقلك كما العصفور ..

وانا ف جيشك .. هاكون منصور ..

وهارجعلك و لو بينا بلاد و بحور ..

على شطك .. ومن رملك .. اشيدلك بيوت و قصور ..

ولا يشمت غريب فينا ولا حتى عدو مسعور ..

انا عاشق .. بموت فى ترابك المرمر ..

انا عاشق .. بدوب فى كلامك السكر ..

مسيرها الدنيا دى بتدور ..

وهابقى يا غالية بين عشاقك الهايمين ..

امير مسحور ..

*****

طارق المملوك

22/1/2011

قصيدة .. و الله زمان

والله زمان
****
البيت منور بالوشوش الطيبين
زينة المكان والحى .. بستان الحنين
لساه فاكرنى ومانسنيش
رغم الزمن .. رغم السنين ..
مشتاق وفاكرانى الحيطان ..
احكيلها تتنهد اهات ..
تسمع حكاوى الاغتراب ..
لحن الحيارى المحرومين ..
احكيلها وان كلى اضطراب ..
والكلمة تلحق اختها ..
تخلص سنة .. ابدأ سنة ..
تدبل ف اجواء الربيع.. السوسنة ..
رحالة تندهنى الموانى البردانين.. وارجع لمين؟
ولمين انا؟..
والصوت ينادى من بعيد ..
انت اللى كنت ..و انت اللى كان ..
تاخدنى بالحضن البيبان ..
فرحة زمان .. والله زمان ..
فرحة ولا تسوى بمال ..
وحشانى ياما و اه يا خال ..
و كفوف بتسقيك الحنان و تهدهدك..
على موج شطوط ..
بركة ايدين حفر الزمن فيها الخطوط
اغصان ورود ع الخد ناعمه حنينة
تعزق غيطان .. تملا الفضا فرح و خضار ..
بين البيارق و الدفوف تستقبلك ..
فرح و غنا ..
يوم المنى ..
يوم مالتقيت نفس الوشوش المؤمنه ..
نفس القلوب الموصولين مع ربنا ..
ضحكة بترقص م الفرح
جواعيون المشتاقين
عطشان و يروينى الكلام
و نظرة ماتشيلش الملام ..
لما تشوفك تبتسم ..
وحديت عجيب ولا الف ليلة بتترسم ..
عن كان و كان ..
يا ابن البلد .. والله و زمان ..
طارق المملوك
3\4\2010

قصيدة .. يوم فى السنة

يوم ف السنة
****
بتوحشونى ..
ولو ف يوم راح يسالونى ..
هافتكراجمل صحاب ..
هافتكر كل اللى كان ..
كل شارع .. كل حاره .. وكل باب ..
كل كلمة..
و كل سطر من الكتاب ..
كل حرف و كل جملة ..
هافتكر حتى المكان ..
رغم المحن .. رغم اللى كان ..
هاضحك قوى .. وانا بنكوى ..
وهاقول ياريت كل اللى كان ده يكون سراب ..
زى الكابوس يطلع نهار .. وهاينتهى ..
ونرجع كما كنا تمام ..
شلة صحاب ..
يجمعنا حلم و روح و فكر ..
و 100 مكان ..
اخوات و عزوة و جدعنة ..
ومافيش مشاكل .. عكننة ..
مين زينا ..
الاقيكوا فين ؟؟ ..
من صبح المكان وياه هناك ..
ومين لساه بينا هنا ..
فضيت اماكن وسطنا ..
وصبح البراح جوا قلوبنا و عقلنا ..
الصوت يرن ف سمعنا ..
والنور بيضوى ف رؤيا ساكنه عمرنا ...
لسه الوشوش زى الملايكة .. ماتختفوش ...
خلي جناحات الهنا .. تفضل هنا ..
ترسم الكون الجميل ..
والفرحة بينا تتقسم ..
والطيف ولو طالل حزين ... طول السنة ..
مسيره يرجع يبتسم..
ولو حتى كان يوم ف السنة ..

طارق المملوك
31-3-2010

من أقوالهم - كسرى أنوشروان

من أقوالهم
كسرى انو شروان
****
يقول بعض الناس أن التدين يكون أكثر إنتشارا بين الفقراء من الناس أكثر بكثير من أعاظم الناس ، و هذا يفسره إختفاء حكام المسلمين بعيدا عن مشاكل شعوبهم، فيأخذون من القرارات من هو ضد رغبات شعوبهم ، و يستصدرون من القوانين من هو ضد مصالح الشعوب ، و كثيرا من قراراتهم يكون فيها زيادة فى تجويع البشر ، وزيادة فى متاعب حياتهم ، و تعويق مقدراتهم المعيشية ، وزيادة فى الفقر و الظلم و الذل و المهانة.
استغرب دائما من بيده الحكم وينسى انه يحكم بإرادة الله فى ملكه، فالمُلك الذى كله لله عز و جل يؤتيه لمن يشاء ، فكل من يَحْكُمُ فى ملك الله يَحْكُمُ بمراد الله ، فكيف يخالف من يحكم فى ملك الله إرادة الله ، و كيف يكفر بها وهو بيد اعلى سلطة بيد بشر ، فهو أقدر الناس على فهم قصور إرادة البشر مهما اوتى من قوة ، وهو أكثر يعلم ضعف البشر و قته مهما تملك من الكنوز و الاموال ، يعلم انها لا تنفع و لا تجلب سعادة اكثر من غيره من البشر.
استغرب حكامنا و اولى أمر المسلمين ، ينسون الخالق ، و ينسون التفكر ، و ينسون القدرة الالهيه فيظن الفرد منهم انه مخلد فى النعيم فلا موت و لا حساب ولا بعث ، ينسى الحياة الابدية و يتذكر الفانية ، يتذكر ملكه و ينسى ملك الملوك و ملكوته الاذى لا يعرف حدوده الا هو.
وعندما اتفكر فى كل هذا يحضرنى ما كتبه الشيخ محمد الغزالى فى كتابه " هذا ديننا " ، فإنه ذكر انه قيل أن كسرى انو شروان ملك الفرس اضطجع ذات ليلة ، ثم سرح طرفه فى الآفاق البعيدة ، و أرسل هذه الكلمات النابضة:

أيها الفلك ، إن بناءاً أنت سقفه ، وإن بيتا أنت غطاؤه لعظيم ، وإن شيئاً أنت تظله لكبير ، وإن فيك لعجباً للمتعجبين ..
فليت شعرى ، أعلى عُمُدٍ من تحتك تستمسك؟ أم بمعاليق من فوقك؟
و لعمرى إن ملكاً أمسكتك قدرته لملك عظيم قدير ؛ وإنه – فى استدارتك بتقديره – لحكيم خبير ، وإن من غفل عن التفكير فى هذه العظمة لغِرٌّ صغير.
وليت شعرى أيتها الأفلاك : بم طلوعك حين تطلعين ؟ وبم مسيرك حين تسيرين ؟ وأفولك حين تأفلين ؟ و علام سقوطك حين تغيبين ؟
ليت شعرى : أساكنة أنت ، أم تتحركين ؟ أم كيف صفتك التى بها تتصفين ؟ و لونك الذى به تتسمين ؟ و من سماك بأسمائك التى بها تعرفين ؟
فسبحان من لأمره تنادين ، و بمشيئته تجرين ، و بصنعته استقامتك حين تستقيمين ، و رجوعك حين ترجعين.

سبحان الله الذى وجه عين هذا الكافر عابد النار الى تفكّر قد نسيه كثير من المسلمين واغلب اولى أمرهم ، كلمات قد لا ينطق بها مسلم طوال حياته.
اخوانى الاعزاء لتفكر فى خلق الله و ملكوته عبادة كانت اول عبادة من رسولنا صلى الله عليه و سلم ، فى غار حراء ، عبادة تجعل الانسان روحا مرفرفه فى ملكوت الله تسمو فى رحاب ملكه و رحمته ، روحا نفخها الله سبحانه و تعالى فينا فتستريح كلما تقربت الى طاعته و التفكر بعظمته فسبحانه جل شأنه فرض لنا ما يعيننا، فهو الخالق و نحن مخلوقاته وهو اعلم من يخط لنا سبيل النجاة و طريق السمو و الراحة الخالدة.
****
طارق المملوك
13-2-2009

قصيدة / هايبر خيبر

..هايبر خيبر..
*****

هايبر خيبر .. فتحت فرع جديد ف السوق ..
فرع ف بحرى .. وفرع ف قبلى .. وباب اللوق..
فرع ف كل بلاد اوطانى .. فرع بتفتح لينا بيبانه بقوة وعافيه ..
ومرة بذوق..
فرع ف كل امارة .. و حاره.. وعطفة و شارع ..فاتح بوق ..
"خش اتفرج .. واوعى تهرج .. واسكت .. واسمع .. كله هدوء"
*****

ركن العزة.. مش متوفر اى بضاعة ..
واسمع منى ..ومش شعوذة و لا حب اذاعة ..
اوعى تفكر انك يمكن يوم هاتعوزها و تحتاج ليها ..
كماليات ومظاهر فارغة .. مش محتاجها وعينك فيها..
اسال نفسك قبل جيوبك .. لو هاتجيبها .. هاتستعملها وهاتعيش بيها؟
*****

ركن كرامتك .. مش متبقى من المعروض .
الا الاعلان عن ركنها .. وده كان مفروض ..
بقى ده كلام تشتروا بفلوسكم موضه قديمة و مش مطلوبه
نفعت ايه العنطزة غيركم .. شوفوا قدامكم كوريا و كوبا ..
لو نفعتهم .. يوم كرامتهم .. يبقى يا ويلكم لما بلادكم ييجى اليوم و تكون منكوبه..
*****

ركن الامة .. هنا للاسرة بكل ما فيها ..
كله بيهتف م الصبيحة .. تسقط .. تسقط .. مش عايزينها .. كله كارهها .. ومستغبيها ..
هنا فانتازيا .. كوميديا.. يا هو .. ابيض و اسود زى ماقالوا و بيحبوه ..
فيلم قديم انتاج هوليود .. شغل صهاينه و فعل يهود .. بس الناس كلها حبوه ..
تاخد فيلم .. التانى هدية ..انتاج سنه فى القرن الماضى .. شوف الصلاحية ..واوعى تقولى هاتكتشفوه ..
*****

ركن رجالى .. ده اخر نقطه .. قرب و اسمع اخر نكتة ..
خدلك ساتر .. حرص و اوعى يجيلك ساكته ..
مرة ف يوم كان واحد راجل زى جنابكم حب يبمبك ..
يبقاله كلمه .. و قال لاسياده خدونا ف ريحكم .. زى ما تقعد هاقعد جنبك ..
حتتك باتتك .. بقت الرحمة تجوز ما تجوزشى .. ماتستعجبشى .. لما انقرض النوع من ارضك ..
*****

ونسيت اقولك قبل ماتدخل ..
ان الهايبر .. مليان بيكم..
كله بضاعة مغشوشة و فاسده .. وضحكوا عليكم ..
المعروض هو انت و هو .. وقطعوا ايديكم ..
ربطوا لسانكم .. وجمعوا ما بينكم.. ويا خيبتكم .. هايوريكم ..
اصحوا و شوفوا .. العار قدامنا .. شمالنا يمينا ..وفوق تحتينا ..
ذل و ضعف .. بيطلع منهم كلمة و حرف .. ومن حوالينا ..
قولوا لاخوانكم اهل العزة .. جوا ف غزة .. جراح تكوينا ..
زى ما فيكم .. قتل وبرد .. و قسمة و ضرب.. وقصف و رعد ..
زى ما فيكم .. هدم و طرد.. وحزن و كرب .. وسرقة ارض ..
زى ما فيه احضان ف بلادنا مدت ايدها ف ايد الغرب .. وساندوا ف بعض ..
فينا كتير بيصحوا ضميرنا .. ماشيين بينا ف شرق و غرب ..
مادين ايدهم .. صدقوا الوعد..
عينا بصيرة ..
قلوبنا حصيرة..
وايدنا جامدة ومالكة الارض..
تنسف كل جبال الذل .. وبينا تعود ..
جيش حطين يتجمع تانى و كله اسود ..
هايبر خيبر.. فعل يهود ..
إنتظرونا ..
"جيش محمد سوف يعود"
****

طارق المملوك
8/1/2009

هدية يوم الميلاد

هدية يوم الميلاد

*****
عندما تضل الطريق بصحراء شاسعة،لا تجد الا سرابا ور مالا، او عندما يغلفك الضباب وتشعر بالاختناق، فلا رؤية ولا حدود ولا كائنات، كذلك عندما يضيق العالم من حولك، وتكثر من حولك المشكلات فلا حلول ولا بصيص امل للحيلولة دون وقوع قضاء الله و قدره، تجد هناك ثلاثة انواع من البشر يتعاطون مع الموقف من جهات و اساليب مختلفة।

اولهما من يسبب الاسباب الدنيوية ويمنطق و يحلل المشكله الكبرى بالحسابات و الاولويات، فلولا كذا ما كان حدث كذا ، و لولا تدخل كذا لكان كذا و كذا ، ولو ان فلان قد فعل هذا لكانا فى غنى الان عن تلك الورطة، فهو يجنب الاقدار و المشيئة الربانية و ينظر الى ماديات الامور بالعين المجردة، فلا يجنى الا هما و غما ولا يزيده التناجى و الشياطين الا كدرا و ندما و نكدا، و تاخذه الحياة يعاندها و تعانده ، و يكيد لها فتكيد له।

وثانيهما من يكل امره الى خالقه ويرضى بقضاء الله و قدره، فيرضى نفسا و يقر عينا، فيستطيع بعد وهلة ان يواجه مصيره فى الحياة، يرضاها فترضى به، ويعيشها كضيف عابر فتكرمه।

و ثالثهما من يؤول الحقائق و يدرس اللاوضاع، و ياخذ بالتحليل و المنطق فى ظل ان الله مدبر الكون، وان كل شئ بقضاءه و قدره، ولكنه يحاول التفكر و التعلم من مقدرات الامور، و اسس تحريك الكون وقواعد الامور الدنيوية ، و لا ينسى ان فوقها و يتحكم فيه و فيها مشيئة الرب الخالق المسبب للاسباب ، من يجعل لك فى ظلمة الدنيا نورا ، و فى عمى العيون بصيره.

هذا الثالث هو الفائز، تجده فى عز الليل البهيم، وسط تلاطم الامواج من حوله، و هطول امطار الشتاء الغزية فى وسط البحر الهادر يهاتفه اقرب الناس اليه، من اللامكان ، بلا موعد ولا توقعات، يناجيه و يواسيه و يحتضن قلبه و روحه، فيقوم من غفوته فيرى الدنيا كما يحبها، حدائق و زهور و تغريد طيور، رفاهية و رغد و سعاده।

ياخذه الصوت الى عالم اخر، فيهيم فى عالم رحب، ويكون يوم ميلاد، فينسى الهموم و الظنون و القلق। ويسجد لله شاكرا حامدا ان رسم فوق العيون الحزينة بسمة احيا بها مقلة الامل، فاخرجه من ضيق الماديات الى رحابة الروحانيات، فحلق فى فضاء الرضا و السعادة

*****

بقلم / طارق المملوك

4-12-2008

قصيدة / فاكر

هافضل فاكر
*****
طول ما فصول السنة بتدور .. و بترجع تانى تخضر بينا .. هاتفتكرينى ..
طول ما الشتا لساه بيجينا .. ولسه البرد بيحضن جوفنا .. هاتفتكرينى ..
طول ما الشمس بتشرق لينا .. و ترجع فجاة تغيب من تانى .. هاتفتكرينى ..
طول ما الدنيا بتدى و تاخد .. طول ما قمرنا هايفضل واحد ..
لازم دايما تفتكرينى ..
افتكرينى .. وافتكريلى ..
كل الوقت اللى انا حليته .. باغلى امان ..
والايام اللى ماليتهالك .. احلى حنان ..
وانتى هناك و الدنيا معاكى ..
هاتفتكرينى .. واوعك تنسى ..
واوعى الزعل اللى دخل بينا يخليكى تقسى ..
وابقى ادعيلى بعدد الدمع اللى ملى عنيا ..
وقد الالم اللى بيقتلنى و ساكن فيا ..
وقت وعدى ده بالنسبة لك ..
بس ده عندى العمر بحاله .. ونور لياليا ..
كنت الغالية ..
كنتى الدنيا و كل ما فيها .. وكل ما فيا ..
افتكرينى .. وابقى افتكرى ..
كنت بخاف لو تبعدى خطوة .. بعيد عن عينى ..
كنت بموت و الضحكة الغايبة دى سر الدنيا اللى بيحيينى ..
اياكى تنسى ازاى وانا جنبك .. قلمى اتعلم بس عشانك احلى كلام ..
وازاى يبقى كلامنا العادى .. سحر و مغنى .. وهو آلام ..
وازاى تصبح دنيا الواقع كون مسحور ..
وازاى يبقى القلب العاشق .. مش مكسور ..
وازاى عمر الحب الجارف .. يصبح شايف .. ارض الهنا والعشق الخايف ..
مارد يقتل ف الاوهام ..
تمر ايام .. وتمر شهور .. و سنين قدام ..
اقصدك قدامك ..
عيشى زمانك .. عيشى مكانك ..
عيشى العمر الى انا ماقدرتش اوهبهولك ..
يمكن يوم يجمعنا و يمكن اسرقهولك ..
لو من عمرى ومن ايامى .. راح اوهبهولك ..
بس ادعيلى انى افضل فاكر ..
ثانية بثانية .. وكلمة بكلمة ..
نظرة بنظرة شافيتها عنيا ..
هافضل فاكر .. ده انتى العمر اللى بيحينى ..
قلبى العاشق مابينكرشى .. وانا مش ناكر ..
هافضل فاكر عمرى معاكى ..
وانتى انسينى ..
*****
طارق المملوك
28-7-2008

قصيدة / زعلتى ..؟

.. زعلتى ..؟
*****
ايه .. زعلتى؟.. طب وماله؟..
مانتى ياما كسرتى قلبى ..
وسيبتى حبي .. يبكى حاله ..
ايه زعلتى؟ ..
رعشة الايام فى كفك .. دمع عينك ..
زعلوا منى .. وصرخوا .. قالوا ..
م النهارده كل واحد راح لحاله ..
كلمتين كتبوا النهاية ..
كلمتين .. منك لقيتنى بره قلبك ..
بره جنه عشت فيها من البدايه ..
احلى عشق و احلى حب ..
و النهاية .. هى هى ..
حوا عارفها الحكاية ..
يوم تحن .. ويوم قسية ..
كل مرة تكتب الاحداث بدقه .. وبمهاره ..
و الشطاره طبع فيها .. م البداية للنهاية ..
ايه زعلتى..؟
طب و ماله ..؟
مانتى ياما حرمتى قلبى انه يزعل ..
حتى حبي .. كرهتى يوم يجيه و يكمل ..
دول يومين لو حتى طالوا ..
الزمان هيطفى نارى ..
و البعاد هايجيب رجوع ..
ايوة راجع يوم .. واعيش ..
فاكره قلبى ..؟ مايتنسيش ..
زى حبي .. ماتلاقيش ..
كنت بنسى نفسى بيكى .. وافتكر اسمك و بس ..
بنسى روحى .. وبنسى قلبى .. وافتكر عشقك و بس ..
بس عارفه .. اشكرك .. استاذتى حوا ..
اصل منك ..
خدت اقسى .. واقوى درس ..
*****
طارق المملوك
1/7/2008

قصيدة / قلب و عاش

قلب و عاش
*****
دقة جديدة .. بتحيي القلب اللى خلاص مات ..
بعد الهجر.. وبعد العمر ماعدى وفات ..
جاي تقولى: " القلب اتعلق .. وخلاص داب "..
كنت سايبنى العمر بحاله .. وبعد غياب..
قلبى ومات ..
والعمر بيجرى .. وعدى وفات ..
عشته ف بعدك .. يوم ف عذاب وسنين بآهات ..
جاي تقولى: " بيوتنا قريبة ..
والشباك اللى زمان كان بيطل عليا ..
ومابيشوف الا الجدران ..
بقى قدامه خلاص شباك ..من شوق و حنان ..
اسمعى منى .. مافتش الوقت ..
مادام القلب بينبض عشق ..مادمت لحقت ..
اخر نبضه ف قلب الحب ..
واخر دقه ..
ايوة لحقتك قبل الموت ..
كلمة أحبك .. كانت جوا ف قلبى تابوت ..
ولا يوم سكتت .. ولا يوم عرفت معنى الموت " ..
ايوة لمحت الحب ف عينك .. لما قابلتك..
وسط كلامك .. وسط حروفك ..
قمت جريتلك ..
من جدران حبسانى بعيده ..
افتح قلبى مع الشبابيك ..
المس حبك .. والمح عشقك ..
ويا الهوا والفرح هأجيك ..
أنقش اسمك جوا شوارع عرفت حبك ..
بتغيب تحزن ..واما بترجع ..
تفرح بيك ..وتنادى عليك ..
وسط كلامى كتبتك حلم .. ياخدنى لحدك ..
واكون ليك ..
رغم الصعب ..
ورغم الرعب .. اللى انا حسيته ف بعد سنين ..
رغم جروح سيبانى ف حالى بقالها كتير ..
كسب الحب .. وهابقى انا ليك ..
*****
طارق المملوك
25-5-2008