شريط اخبار شخبطة ملوكى

الأربعاء، مايو ٠٩، ٢٠٠٧

قصيدة / لحن عاشق


.. لحن عاشق ..
*****
لسه عاشقك ..
لسه عايشك ..
لسه فاكر ..
رعشة الحب اللى عايش جوا منى..
بحر هادر زى ما هوا .. و من سنين ..
يسكنك ويعيش ف غنوة ..
لحنها مفتاحه دايب م الحنين ..
نوته مكتوبة بدمايا ..
ونبض قلبى ..
ونور عيونى ..
نجمة تضوى ف ليل سمايا ..
بلحن هايم ..
شقشق الفجر اللى نايم .. بين جفونى ..
و ابتسم ..
لما اتولد لحنى اللى دايب واترسم .. ف جفون عنيكى ..
يترمى ف حضنك ياخدنى .. باحلى لمسه ..
لمسة السحر ف ايديكى ..
تتقرى الكلمة ف شفايفك .. اغلى همسه ..
وابقى لامسك .. وابقى شايفك ..
تتولد دنيا ف عينيكى ..
دنيا جدرانها بهواكى..
عشت بيها ..
عشت فيها ..
عايشه فيا وجوا منى ..
بس قولى .. ازاى وامتى ..
اتبنت جوايا دنيا .. باسمك انت ..
من سنين عشقك بانيها ..
وحتة حتة ..
ركن ركن ..
وحارة حارة ..
شكلها من صورتك انتى ..
حِسَها من قلبك انتى ..
ولا صوتها و ضحكها .. من لحنك انتى ..
لحن قلبك ..
اتولد وقت اما قابلك ..
عيشي قلبى .. واسكني بالعشق حبي ..
دى البيوت تسكن صحابها ..
و الشوارع تمشى فيهم ..
والدروب تتغنى بيهم ..
لما تنده .. تتولد فرحة ف عنيهم ..
والاماكن عاشقة صوتهم ..
تنكوى ف البعد عنهم ..
مدى ايدك .. خطى قلبى ..
عيشى دنيا بنيتها ليكى ..بيوت .. مداين ..
و اللى ساكن جوا منها ..
هو انت ..
ايوة انت .. ومين سواكى ..
يحضنك قلبى و يرفرف فوق سماكى ..
تسكن الفرحة ف هواكى ..
ابقى مين ؟ ..
ابقى اللى عاشق ..
واللى سهمك جوا منى ..
رغم بعدك .. لسه راشق ..
*****

طارق المملوك
8/5/2007

هناك ٦ تعليقات:

AHMED SAMIR يقول...

كالعادة طبعا بوست رائع
وفي حاجة روعة كمان وهي اني اول كومنت للبوست دة ودي حاجة نادرا ما تحصل في المدونة الروعة دي
ولو اني زعلان علشان صاحب المدونة يا استاذ طارق مطنشني ومعدش بيعبر مدونة العبد لله ويشرفها بتعليقاته اللي اكيد بستفيد منها
تحياتي واحتراماتي

محمد عبد الغفار يقول...

عود احمد

حواء يقول...

حلو اوى كلامك وخصوصا النهاية .. رغم بعدك لسة راشق .. طبعا لازم تكون راشق البعد مش حيغير المشاعر .. تحياتى ..

hesterua يقول...

الله عليك يا عمنا

فينك

شخبطة ملوكى يقول...

احمد سمير
اخى الحبيب اشكرك على متابعتك و اعذرنى لضغط الوقت فالعمل هنا بدبي كححححححححححححن
اخى محمد عبد الغفار
اشكرك على السؤال المتكرر و المتابعة
والله اخ جميل وراقى .. احبك فى الله
بوسي كات
اشكرك على الزيارة و التعليق و اتمنى دوام الزيارة
اخى hesterua
اشكرك على تعليقك وانا هنا و الله موجود و لكن ضيق الوقت يمنعنى من الانتظام فى المتابعة و كتابة جديد
اشكرك
اخى صاحب البوابة
اشكرك لنشر موضوعك و الزيارة

غير معرف يقول...

جميلة جميلة جميلة يا فنـــــــــــان
بجد كلماتك ليها طعم خاص جدا
بياخدني وسطيها
أعيش اللحظة معاها
ممكن أفضل هناك
و ممكن أوي أرجع لوحدي
و أستناك
تكتب جديد
ف ما تبخلش عليا الله يخليك
و اكتب كمان و كمان
منى