قصيدة / كلنا خالد سعيد - طارق المملوك

قصيدة / ف شرع مين - طارق المملوك

ف شرع مين
*****ف شرع مين؟؟
الديابه تعيش و تنهش ف الغلابة
و العصابة تستبيح كل الشوارع ..
تستبيح كل المداين و الحوارى ..
تستبيح كل المنازل و المطالع ..
يندبح كل اللى فينا .. خير وبسمه و ناس طيابه ..
يقتل الخاين غنانا ..
لحن موالنا اللى ساكن ع الربابه ..
*****
انت قولى ف شرع مين ؟؟
و اكتب الاشعار لمين ..
للى خاين شعبه عايش ف القصور ؟؟
للى بايع خير بلاده ورامى شعبه ف الجحور ؟؟
عاش هناك فى جناحه نايم ف النعيم ..
السرير و الحقنة .. حتى تغمسته للقمه ..
تنبلع ف الضلمة و ايديه ترتعش ..
هو ده اصله الجحيم ..
و الرجال ف الطل قاعدين حرانين ..
شمسنا برد و سلام ..
ف الميدان .. حضن و براح ..
احنا اللى باقيينلك يا غالية ..
و الخسيس هو اللى راح ..
*****
انت قولى ف شرع مين ؟؟
بكره واخدنا لنجاة .. ولا لفين ..؟؟
انتو مش واقفين مكانا ..
انتو مش سامعين كلامنا ..
واحنا مش سامعين نشازكم..
وسط ثورتنا و غنانا ..
احنا مش قابلين دلعكم..
لو صراخنا مش تاعبكم .. او كلامنا مش هاممكم ..
ييجى بكره ونحاكمكم ..
ونعاقبكوا بشرعنا ..
كل خاين او عميل ..
كل لص و كل سارق ..
كل ديل .. للكلب يعوى ف وشنا بنهار و ليل..
القصاص بالعدل هايكون ف انتظاره ..
كل ظالم .. كل فاجر ينتهى ويا انكساره ..
شرعنا ينطق يقول .. وده حكمنا ..
شعبنا سيد قراره ...
كل مفسد له عقابه ..
شرع رب الكون بحُكْمُه خصنا بمطلق عدالته ..
واحنا جند الحق واهبين الحياه .. نبض الحياه ..
يطلع بقى مين هو .. بسعادته ..
اللى بالينا بعياله و بمدامته ..
اللى محمى بين لصوصه .. و ببطانته ..
اه لو عرفناه هو مين؟؟
اللى حابس الجناه جوا القصور ..
اللى واهب للى قاتل الف بستان للحياه ..
مليان زهور ..
يبقى مين فينا اللى ظالم .. و الجبان ..
يبقى مين فينا اللى قاتل و المٌدَان ..
اللى قاعد ف الجناح واكل و شارب ..
اللى ناهب .. اللى هارب ..
ولا اللى ف الحر انكوى جوا الميدان ..
قبل ما نسمع جواب ..
قولنا بس بهداوه انت راح تحكم لمين ..
و بشرعنا ..
ولاانتو ناويين تظلموا .. و بشرع مين؟؟؟
*****طارق المملوك
10/7/2011

قصيدة - وجالك يوم

وجالك يوم

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه ؟؟!!..

ما ادبتيش عيالك ليه؟؟!!..

ما حرمتيش .. تيجيبى عيال ؟؟!!..

لا جاى اشمت ولا اعايرك ..

ده انا خجلان وانا جايلك ..

ده انا ولدك .. انا شايلك ..

فى ننى عيونى من جوه..

وفاردلك قلوع الشوق .. بعزيكى ..

يا بختى لما ابكِيكى و ابكيكى ..

ولا يشمت عدو فيكى ..

آدى طرحك .. وآدى حالك و دى نفسك ..

آدى عيالك .. و ده خلفك ..

منيش مستنى اعذارك .. ولا اسفك ..

وحسرة قلبك الدبلان .. على سلفك ..

شوفى عيالك ..

ده واعدك لما يتعافى ياخد يدك .. وراح و ماجاش ..

وده حلفلك يمين الله يصون عهدك .. و ما وفَاش ..

و ده قالك .. اموت فيكى .. و اعيش فيكى .. وماستناش ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه .. اصول اصلك ؟؟!!..

ما ادبتيش عيالك ليه .. و كبرتيلنا رجاله .. تصون عرضك ؟؟!!..

ولا تقولى نصيب مكتوب ولا قسمه ..

عيالك لما عوزتيهم .. يا غالية باعوكى ف الازمه ..

ما ادبتيش عيالك ليه؟؟!!.. يحاوطوكى ف يوم الشده و الازمه ..

وكبرتى ف عيالك ليه .. دبيب الخوف من الجزمة ..

كلام متعاد مالوش عازه .. ولا لازمه ..

كلام ف معاده متاخر .. لا هايقدم ولا ياخر ..

لكن عاتب على يأسك و متحسر ..

بنيتى تحت رمل الارض .. ليه قبرك .. وده هرمك ..

وطمعتى الخسيس فى اللقمه من بوقك .. عشان كرمك ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما أدبتيش عيالك ليه ؟؟!!..

وجايه تلومى سجانك ؟؟!!..

وجايه تموتى من تانى .. فدا عيالك ؟؟!!..

ما علمتيش عيالك ليه ..كلام ناسك .. و علمتيهم الفاضية ؟؟!!..

و هننتى بكلام ماسخ .. و كنتى بتضحكى و راضية ..

كبيرهم لما كبَرهم .. قوام داسك ..

و لما صغيرهم اتفرعن .. حنا راسك ..

بيقيتى لوحدك الملعونة من اهلك .. و حراسك ..

ده ياما قلتلك و بكيت ..

وياما نصحت من قلبى ولا مليت ..

كرهتينى .. و قلتيلى : " واكل ناسك" ..

وانا علمك .. وانا شيخك .. وانا ناسك ..

طردتينى و بعتينى .. وودعتينى بمداسك ..

وقلتى لى بعلو الصوت :

" تحس منين .. ببسمه من ضنا غالى؟؟..

وبتغير ليه ؟؟ بدلع وادى من مالى "..

وادينى مشيت .. وفاكره ف يوم سليت و نسيت ..

وادينى غبت و اتغميت ..

ما عدت بشوف ولا بسمع .. وده حالى ..

و صورتك لسه قدامى ..

بعيد الكلمة لما بشوف ف احوالك .. و احوالى ..

*****

مسير الغم ده يعدى ..

تزيحى الهم من قلبك .. ييجى عندى ..

تعالى فى حضنى و ابكى دموع .. ولا تعاندى ..

ده انا راجلك .. انا سندك ..

انا اللى فى يوم ماهاتميلى هاقوم ساندك ..

انا قلبك .. انا صلبك ..

وبدنى يدوب فدا بدنك ..

وانا وعدك .. الاقيكى ف يوم واعدك ..

وجايلك يوم .. اقولك فيه .. هاييجى اليوم ..

و سجانك هييجى مكانه يوم فارس يجاهد ويا حراسك ..

ويجيى من بعيد ناسك

يبوسوا ايدكى و يرفعوا فى العُلا .. راسك

تسامحينا .. تلمينا ..

فى حضنك يا احن بلاد تدفينا..

تعدى سنين و تيجى سنين ولا تشيخى ..

وزى ما قالى يوم شيخى ..

دى محروسة بميت بركة .. من دعا الصالحين ..

يشقشق من بعيد بكرة .. واكونلك فيه .. منارة نور ..

وفوق شجرك .. ازقزقلك كما العصفور ..

وانا ف جيشك .. هاكون منصور ..

وهارجعلك و لو بينا بلاد و بحور ..

على شطك .. ومن رملك .. اشيدلك بيوت و قصور ..

ولا يشمت غريب فينا ولا حتى عدو مسعور ..

انا عاشق .. بموت فى ترابك المرمر ..

انا عاشق .. بدوب فى كلامك السكر ..

مسيرها الدنيا دى بتدور ..

وهابقى يا غالية بين عشاقك الهايمين ..

امير مسحور ..

*****

طارق المملوك

22/1/2011

وهانعمل ايه ؟؟ !!

وهانعمل ايه ؟؟ !!
****
و هانعمل ايه ؟؟!!
طول ماحنا سايبين فى البيوت خفافيش ..
بتنهش لحمنا البالى..
طول ماحنا راضيين بالنواح.. ونقول ياعمنا..
طب وانا مالى ..
لو جه ماجاش .. مايهمنيش ..
كون انصلح .. او كان بلاش ..
تفرق ف ايه ؟
مبسوط كده .. وعايش انا ف حالى..

وهانعمل ايه؟ ..
انا بيهمنى .. ايه هايجرالى ..
عايش كده .. واهه هو ده حالى ..
بسعى ورا لقمه ..
اجيبها م النجمه ..
بسعى ورا هدمه .. تستراذى عيالى..
قال الخبيث حكمه ..
"هايجينا بكرة بايه؟..
جاى بدموع ف عنيه..
خايف .. جبان و ضعيف ..
شايل كفنه بايديه ..
وشمسه طاقة موت ..
وبعد بكره يفوت ..
وكل يوم بنموت ..
نغرق ف كون عتمة ..
تفرق ف ايه يا ناس .. اهى و السلام خاتمه "..
اعقل كلام الخوف ..
واعرف و بوص و شوف..
نخرص .. يموت الصوت ..
وكل يوم هانموت ..
وموت يجينا بموت ..
اعمل لبكره يكون..
اخلق له طاقة نور ..
اصرخ .. و جاهد .. كون ..
إملى البراح و الكون ..
تحضن ايدك ايديه ..

و هانعمل ايه؟ ..
دى الرجل مش شايلة ..
والعافيه راحت فين .. ف السجن مش طايلة ..
حابسه دموع العين .. جوا السواد و الليل ..
حلم الغلابة بعيد .. اصل النجوم عالية
والصوت طريد القهر .. و الكلمه مش قايلة ..
سجانا مش انسان .. ميت ف عينه الضى ..
وهايعمل ايه وازاى؟ .. ده زمانه بكره جاى ..
ده حاشية عايزة الحرق .. مالهم ف بكره زى ..
ده بكرة جايب سيف ..
للدنيا نازل ضيف ..
ييجى المسيح الحى ..
والكمة وسط الفضا ..
تزعق بميت رنه ..
حلم الرضيع مشروع .. وكلامه يتغنى ..
تحلم بيوم هاتكون .. والخلق تستنى ..
اخلق لحلمك كون .. الارض مش جنة ..

وهانعمل ايه؟
وايدين تروح ع الخد ..
اخر زمان يا خلق ..
الاخ يسرق اخوه ..
ماحد ينفع حد ..
والابن يتقل ابوه ..
ومافيش عقاب و لا حد ..
يا خلق فوقوا يا هو ..
ولاييجى يوم الرد ..
الظلم بينا جابوه ..
و السيرك يوم نصبوه ..
بلياتشو بيلعبوه ..
القرد راكب فيل ..
وغراب وصوته جميل ..
وحيه ترقص رقص ..
ادى اللى كان ناقص ..
ونقص يولد نقص ..
دور البطوله باعوه ..
مقلب وجربتوه ..
واللعبه قلبت جد ..
سيبوا الايدين ع الخد ..
يا تفوقوا بقى وكفاية ..
قمرنا شاخ و اسوًد ..

وهانعمل ايه يا خلق؟ ..
الضعف هو العيب ..
نخرس يزيد الظلم ..
نصر الغلابة قريب..
نروى غيطانه بدم ..
وبكره ياما يجيب ..
ياخد معاه الهم ..
تضم ايدنا ايديه..
تحضن عيونا عنيه ..
لما هاننسى ف يوم..
كلمة هانعمل ايه؟
****
طارق المملوك
11-5-2010

قصيدة - و جالك يوم

وجالك يوم

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه ؟؟!!..

ما ادبتيش عيالك ليه؟؟!!..

ما حرمتيش .. تيجيبى عيال ؟؟!!..

لا جاى اشمت ولا اعايرك ..

ده انا خجلان وانا جايلك ..

ده انا ولدك .. انا شايلك ..

فى ننى عيونى من جوه..

وفاردلك قلوع الشوق .. بعزيكى ..

يا بختى لما ابكيكى و ابكيكى ..

ولا يشمتك عدو فيكى ..

آدى طرحك .. وآدى حالك و دى نفسك ..

آدى عيالك .. و ده خلفك ..

منيش مستنى اعذارك .. ولا اسفك ..

وحسرة قلبك الدبلان .. على سلفك ..

شوفى عيالك ..

ده واعدك لما يتعافى ياخد يدك .. وراح و ماجاش ..

وده حلفلك يمين الله يصون عهدك .. و ما وفَاش ..

و ده قالك .. اموت فيكى .ز و اعيش فيكى .. وماستناش ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما علمتيش عيالك ليه .. اصول اصلك ؟؟!!..

ما ادبتيش عيالك ليه .. و كبرتيلنا رجاله .. تصون عرضك ؟؟!!..

ولا تقولى نصيب مكتوب ولا قسمه ..

عيالك لما عوزتيهم .. يا غالية باعوكى ف الازمه ..

ما ادبتيش عيالك ليه؟؟!!.. يحاوطوكى ف وقت الشده و الازمه ..

وكبرتى ف عيالك ليه .. دبيب الخوف من الجزمة ..

كلام متعاد مالوش عازه .. ولا لازمه ..

كلام ف معاده متاخر .. لا هايقدم ولا ياخر ..

لكن عاتب على يأسك و متحسر ..

بنيتى تحت رمل الارض .. ليه قبرك .. وده هرمك ..

وطمعتى الخسيس فى اللقمه من بوقك .. عشان كرمك ..

*****

و جالك يوم .. قليل الاصل يتنقور ..

و يجرى عليكى يتمسخر .. و يتدوَر ..

و يزعق فيكى .. يتبطر ..

ما أدبتيش عيالك ليه ؟؟!!..

وجايه تلومى سجانك ؟؟!!..

وجايه تموتى من تانى .. فدا عيالك ؟؟!!..

ما علمتيش عيالك ليه ..كلام ناسك .. و علمتيهم الفاضية ؟؟!!..

و هننتى بكلام ماسخ .. و كنتى بتضحكى و راضية ..

كبيرهم لما كبَرهم .. قوام داسك ..

و لما صغيرهم اتفرعن .. حنا راسك ..

بيقيتى لوحدك الملعونة من اهلك .. و حراسك ..

ده ياما قلتلك و بكيت ..

وياما نصحت من قلبى ولا مليت ..

كرهتينى .. و قلتيلى : " واكل ناسك" ..

وانا علمك .. وانا شيخك .. وانا ناسك ..

طردتينى و بعتينى .. وودعتينى بمداسك ..

" تحس منين .. ببسمه من ضنا غالى؟؟..

وبتغير ليه ؟؟ بدلع وادى من مالى "..

وادينى مشيت .. وفاكره ف يوم سليت و نسيت ..

وادينى غبت و اتغميت ..

ما عدت بشوف ولا بسمع .. وده حالى ..

و صورتك لسه قدامى ..

بعيد الكلمة لما بشوف ف احوالك .. و احوالى ..

*****

مسير الغم ده يعدى ..

تزيحى الهم من قلبك .. ييجى عندى ..

تعالى فى حضنى و ابكى دموع .. ولا تعاندى ..

ده انا راجلك .. انا سندك ..

انا اللى فى يوم ماهاتميلى هاقوم ساندك ..

انا قلبك .. انا صلبك ..

وبدنى يدوب قدا بدنك ..

وانا وعدك .. الاقيكى ف يوم واعدك ..

وجايلك يوم .. اقولك فيه .. يجيلك يوم ..

و سجانك يصير فارس ف حراسك ..

ويجيى من بعيد ناسك

يبوسوا ايدكى و يرفعوا فى العُلا .. راسك

تسامحينا .. تلمينا ..

فى حضنك يا احن الخلق تطوينا..

تعدى سنين و تيجى سنين ولا تشيخى ..

وزى ما قالى يوم شيخى ..

دى محروسة بميت بركة .. من دعا الصالحين ..

يشقشق من بعيد بكرة .. واكونلك فيه .. منارة نور ..

وفوق شجرك .. ازقزقلك كما العصفور ..

وانا ف جيشك .. هاكون منصور ..

وهارجعلك و لو بينا بلاد و بحور ..

على شطك .. ومن رملك .. اشيدلك بيوت و قصور ..

ولا يشمت غريب فينا ولا حتى عدو مسعور ..

انا عاشق .. بموت فى ترابك المرمر ..

انا عاشق .. بدوب فى كلامك السكر ..

مسيرها الدنيا دى بتدور ..

وهابقى يا غالية بين عشاقك الهايمين ..

امير مسحور ..

*****

طارق المملوك

22/1/2011

قصيدة .. و الله زمان

والله زمان
****
البيت منور بالوشوش الطيبين
زينة المكان والحى .. بستان الحنين
لساه فاكرنى ومانسنيش
رغم الزمن .. رغم السنين ..
مشتاق وفاكرانى الحيطان ..
احكيلها تتنهد اهات ..
تسمع حكاوى الاغتراب ..
لحن الحيارى المحرومين ..
احكيلها وان كلى اضطراب ..
والكلمة تلحق اختها ..
تخلص سنة .. ابدأ سنة ..
تدبل ف اجواء الربيع.. السوسنة ..
رحالة تندهنى الموانى البردانين.. وارجع لمين؟
ولمين انا؟..
والصوت ينادى من بعيد ..
انت اللى كنت ..و انت اللى كان ..
تاخدنى بالحضن البيبان ..
فرحة زمان .. والله زمان ..
فرحة ولا تسوى بمال ..
وحشانى ياما و اه يا خال ..
و كفوف بتسقيك الحنان و تهدهدك..
على موج شطوط ..
بركة ايدين حفر الزمن فيها الخطوط
اغصان ورود ع الخد ناعمه حنينة
تعزق غيطان .. تملا الفضا فرح و خضار ..
بين البيارق و الدفوف تستقبلك ..
فرح و غنا ..
يوم المنى ..
يوم مالتقيت نفس الوشوش المؤمنه ..
نفس القلوب الموصولين مع ربنا ..
ضحكة بترقص م الفرح
جواعيون المشتاقين
عطشان و يروينى الكلام
و نظرة ماتشيلش الملام ..
لما تشوفك تبتسم ..
وحديت عجيب ولا الف ليلة بتترسم ..
عن كان و كان ..
يا ابن البلد .. والله و زمان ..
طارق المملوك
3\4\2010

قصيدة .. يوم فى السنة

يوم ف السنة
****
بتوحشونى ..
ولو ف يوم راح يسالونى ..
هافتكراجمل صحاب ..
هافتكر كل اللى كان ..
كل شارع .. كل حاره .. وكل باب ..
كل كلمة..
و كل سطر من الكتاب ..
كل حرف و كل جملة ..
هافتكر حتى المكان ..
رغم المحن .. رغم اللى كان ..
هاضحك قوى .. وانا بنكوى ..
وهاقول ياريت كل اللى كان ده يكون سراب ..
زى الكابوس يطلع نهار .. وهاينتهى ..
ونرجع كما كنا تمام ..
شلة صحاب ..
يجمعنا حلم و روح و فكر ..
و 100 مكان ..
اخوات و عزوة و جدعنة ..
ومافيش مشاكل .. عكننة ..
مين زينا ..
الاقيكوا فين ؟؟ ..
من صبح المكان وياه هناك ..
ومين لساه بينا هنا ..
فضيت اماكن وسطنا ..
وصبح البراح جوا قلوبنا و عقلنا ..
الصوت يرن ف سمعنا ..
والنور بيضوى ف رؤيا ساكنه عمرنا ...
لسه الوشوش زى الملايكة .. ماتختفوش ...
خلي جناحات الهنا .. تفضل هنا ..
ترسم الكون الجميل ..
والفرحة بينا تتقسم ..
والطيف ولو طالل حزين ... طول السنة ..
مسيره يرجع يبتسم..
ولو حتى كان يوم ف السنة ..

طارق المملوك
31-3-2010

قصيدة / هايبر خيبر

..هايبر خيبر..
*****

هايبر خيبر .. فتحت فرع جديد ف السوق ..
فرع ف بحرى .. وفرع ف قبلى .. وباب اللوق..
فرع ف كل بلاد اوطانى .. فرع بتفتح لينا بيبانه بقوة وعافيه ..
ومرة بذوق..
فرع ف كل امارة .. و حاره.. وعطفة و شارع ..فاتح بوق ..
"خش اتفرج .. واوعى تهرج .. واسكت .. واسمع .. كله هدوء"
*****

ركن العزة.. مش متوفر اى بضاعة ..
واسمع منى ..ومش شعوذة و لا حب اذاعة ..
اوعى تفكر انك يمكن يوم هاتعوزها و تحتاج ليها ..
كماليات ومظاهر فارغة .. مش محتاجها وعينك فيها..
اسال نفسك قبل جيوبك .. لو هاتجيبها .. هاتستعملها وهاتعيش بيها؟
*****

ركن كرامتك .. مش متبقى من المعروض .
الا الاعلان عن ركنها .. وده كان مفروض ..
بقى ده كلام تشتروا بفلوسكم موضه قديمة و مش مطلوبه
نفعت ايه العنطزة غيركم .. شوفوا قدامكم كوريا و كوبا ..
لو نفعتهم .. يوم كرامتهم .. يبقى يا ويلكم لما بلادكم ييجى اليوم و تكون منكوبه..
*****

ركن الامة .. هنا للاسرة بكل ما فيها ..
كله بيهتف م الصبيحة .. تسقط .. تسقط .. مش عايزينها .. كله كارهها .. ومستغبيها ..
هنا فانتازيا .. كوميديا.. يا هو .. ابيض و اسود زى ماقالوا و بيحبوه ..
فيلم قديم انتاج هوليود .. شغل صهاينه و فعل يهود .. بس الناس كلها حبوه ..
تاخد فيلم .. التانى هدية ..انتاج سنه فى القرن الماضى .. شوف الصلاحية ..واوعى تقولى هاتكتشفوه ..
*****

ركن رجالى .. ده اخر نقطه .. قرب و اسمع اخر نكتة ..
خدلك ساتر .. حرص و اوعى يجيلك ساكته ..
مرة ف يوم كان واحد راجل زى جنابكم حب يبمبك ..
يبقاله كلمه .. و قال لاسياده خدونا ف ريحكم .. زى ما تقعد هاقعد جنبك ..
حتتك باتتك .. بقت الرحمة تجوز ما تجوزشى .. ماتستعجبشى .. لما انقرض النوع من ارضك ..
*****

ونسيت اقولك قبل ماتدخل ..
ان الهايبر .. مليان بيكم..
كله بضاعة مغشوشة و فاسده .. وضحكوا عليكم ..
المعروض هو انت و هو .. وقطعوا ايديكم ..
ربطوا لسانكم .. وجمعوا ما بينكم.. ويا خيبتكم .. هايوريكم ..
اصحوا و شوفوا .. العار قدامنا .. شمالنا يمينا ..وفوق تحتينا ..
ذل و ضعف .. بيطلع منهم كلمة و حرف .. ومن حوالينا ..
قولوا لاخوانكم اهل العزة .. جوا ف غزة .. جراح تكوينا ..
زى ما فيكم .. قتل وبرد .. و قسمة و ضرب.. وقصف و رعد ..
زى ما فيكم .. هدم و طرد.. وحزن و كرب .. وسرقة ارض ..
زى ما فيه احضان ف بلادنا مدت ايدها ف ايد الغرب .. وساندوا ف بعض ..
فينا كتير بيصحوا ضميرنا .. ماشيين بينا ف شرق و غرب ..
مادين ايدهم .. صدقوا الوعد..
عينا بصيرة ..
قلوبنا حصيرة..
وايدنا جامدة ومالكة الارض..
تنسف كل جبال الذل .. وبينا تعود ..
جيش حطين يتجمع تانى و كله اسود ..
هايبر خيبر.. فعل يهود ..
إنتظرونا ..
"جيش محمد سوف يعود"
****

طارق المملوك
8/1/2009

قصيدة / زعلتى ..؟

.. زعلتى ..؟
*****
ايه .. زعلتى؟.. طب وماله؟..
مانتى ياما كسرتى قلبى ..
وسيبتى حبي .. يبكى حاله ..
ايه زعلتى؟ ..
رعشة الايام فى كفك .. دمع عينك ..
زعلوا منى .. وصرخوا .. قالوا ..
م النهارده كل واحد راح لحاله ..
كلمتين كتبوا النهاية ..
كلمتين .. منك لقيتنى بره قلبك ..
بره جنه عشت فيها من البدايه ..
احلى عشق و احلى حب ..
و النهاية .. هى هى ..
حوا عارفها الحكاية ..
يوم تحن .. ويوم قسية ..
كل مرة تكتب الاحداث بدقه .. وبمهاره ..
و الشطاره طبع فيها .. م البداية للنهاية ..
ايه زعلتى..؟
طب و ماله ..؟
مانتى ياما حرمتى قلبى انه يزعل ..
حتى حبي .. كرهتى يوم يجيه و يكمل ..
دول يومين لو حتى طالوا ..
الزمان هيطفى نارى ..
و البعاد هايجيب رجوع ..
ايوة راجع يوم .. واعيش ..
فاكره قلبى ..؟ مايتنسيش ..
زى حبي .. ماتلاقيش ..
كنت بنسى نفسى بيكى .. وافتكر اسمك و بس ..
بنسى روحى .. وبنسى قلبى .. وافتكر عشقك و بس ..
بس عارفه .. اشكرك .. استاذتى حوا ..
اصل منك ..
خدت اقسى .. واقوى درس ..
*****
طارق المملوك
1/7/2008

قصيدة / قلب و عاش

قلب و عاش
*****
دقة جديدة .. بتحيي القلب اللى خلاص مات ..
بعد الهجر.. وبعد العمر ماعدى وفات ..
جاي تقولى: " القلب اتعلق .. وخلاص داب "..
كنت سايبنى العمر بحاله .. وبعد غياب..
قلبى ومات ..
والعمر بيجرى .. وعدى وفات ..
عشته ف بعدك .. يوم ف عذاب وسنين بآهات ..
جاي تقولى: " بيوتنا قريبة ..
والشباك اللى زمان كان بيطل عليا ..
ومابيشوف الا الجدران ..
بقى قدامه خلاص شباك ..من شوق و حنان ..
اسمعى منى .. مافتش الوقت ..
مادام القلب بينبض عشق ..مادمت لحقت ..
اخر نبضه ف قلب الحب ..
واخر دقه ..
ايوة لحقتك قبل الموت ..
كلمة أحبك .. كانت جوا ف قلبى تابوت ..
ولا يوم سكتت .. ولا يوم عرفت معنى الموت " ..
ايوة لمحت الحب ف عينك .. لما قابلتك..
وسط كلامك .. وسط حروفك ..
قمت جريتلك ..
من جدران حبسانى بعيده ..
افتح قلبى مع الشبابيك ..
المس حبك .. والمح عشقك ..
ويا الهوا والفرح هأجيك ..
أنقش اسمك جوا شوارع عرفت حبك ..
بتغيب تحزن ..واما بترجع ..
تفرح بيك ..وتنادى عليك ..
وسط كلامى كتبتك حلم .. ياخدنى لحدك ..
واكون ليك ..
رغم الصعب ..
ورغم الرعب .. اللى انا حسيته ف بعد سنين ..
رغم جروح سيبانى ف حالى بقالها كتير ..
كسب الحب .. وهابقى انا ليك ..
*****
طارق المملوك
25-5-2008

قصيدة / خد بإيدى

خد بإيدى
*****
مد ايدك .. خد بايدى ..
دفى قلبى .. قوى عينى ..
نفسي اشوفك اقوى منى ..
نفسي اجيلك .. غصب عنى ..
نفسي اقرب ..
نفسي اهرب ..
نفسي اقول .. ومافيش كلام ..
نفسي اصحى .. الكون ينام ..
والقى قلبك جنب منى ومش خيال ..
نفسي احكى .. ونفسي اقولك ..
بس مش قادرة التفتلك ..
عينى تغرق بين دموعها ..
والكلام .. مافيهوش حروف ..
قلبى ينبض .. نبضه خوف ..
خايفه اقولك ..
خايفه اجرح قلبك انت ..
خايفه اقتل حلم عشته جوا منك ..
نفسي اشوفك زى مانت..
قلب عاشق ..
يملى حبك .. نبض قلبك ..
يملى كل الكون اغانى ..
عارفه انك كون لوحدك ..
مالى قلبك بالامانى ..
قلب طيب .. قلب ابيض ..
زى قلب الطفل جانى ..
خلى كل الكون بيضحك جوا منى ..
وعشت تانى ..
عارفه انه غصب عنى ..
ومش بخاطرك ..
واللى جاى مكنش ذنبى ..
ولا ذنبك ..
كنت جنبي .. وكنت جنبك ..
بس حاول تنسى قلبى ..
وسيبنى امشي ..
مد ايدك .. خد بايدى ..
ويالا سلم ..
اوعى تبكى ..
اوعى قلبك .. اللى حبه دفى قلبى ..
ينسى يحكى ..
قصة الحب اللى كانت ..
بين قصايده .. وبين كلامه ..
قصة تحييها المشاعر ..
قول يا شاعر ..
وانسى جرحك .. وانسى خوفك ..
واكتب القصة بحروفك ..
واوعى تنسى .. اوعى تقسى ..
وافتكرنى لما تلقى ..
صورتى ساكنة .. بين حروفك ..
بين سطور قصة كتابك ..
صورة حلوة ..
ذكرى احلى ..
وابقى مد الايد .. وسلم ..
وابقى عارف انى لازم لما هاقرى ..
راح اسلم ..
*****

طارق المملوك
18-5-2008

قصيدة / عارفه انك

..عارفه انك ..
*****
عارفه انك ..
من زمان .. من يوم ما شوفتك ..
حته منى ..
عارفه انك ..
وانتى جنبي .. ومهما غيبتى ..
هاتبقى ليا .. وجوا منى ..
عارفه انك .. زى ما كنتى ..
هاتبقى دايما .. عايشه فيا ..
احلى حلم حلمته ليله ..
احلى لمه .. و احلى عليه ..
احلى فكرة وجات فى بالى ..
فكرة صعبه ..
مش هاقولك مستحيلة ..
عارفه انك ..
طفل باسم .. يجيى دايما ف المواسم ..
وبياخدنى من ايديا ..
لدنيا تانية .. وابقى راسم ..
بكرة اجمل من اللى فاتنى ..
وجاى ليا ..
كنت عارف انى جايلك ..
فى الكتاب شوفتك و شايلك ..
بين كلام زى الطلاسم ..
لسه شايف بين رموزه .. شط تانى ..
شط باسم ..
لسه حاسس من كلامه ..
طعم تانى ..
عارفه انك ..
احلى صحبة ورد نادى ..
تحتوينى فى ليلة بارده ..
وابقى راضى ..
احلى لون و العطر هادى ..
احلى لحن بصوته شادى ..
ده انتى غنوة عمرى كله ..
وانتى زهر العمر .. فله ..
والكلام بينادى قلبى ..
ويا نبض القلب قاله ..
وانتى مين زيك حبيبتى ..
وانتى مين؟؟ ..
سكنى .. ومدينتى ..
ده انتى عينى ..
وانتى قلبى ..
وانتى روحى .. وكل حبى ..
عارفه انى .. ولا اقولك ..
مش هاقولك ..
مانتى عارفه اكيد بحالى ..
وانتى شايفه لو بايدى ..
اجريى ليكى .. ويجرى دمى ..
يبقى مهرى ..
وانتى مهرك عندى غالى ..
*****

طارق المملوك
13-4-2008

قصيدة / ده يوم عادى

ده يوم عادى
*****
ده يوم عادى ..
لأ..
ده مش عادى ..
زمانك حتى مش عادى ..
يبان اكبر ..
يبان اجمل ..
يبان لو حتى كان اصغر ..
هواكى ف قلبى بينادى ..
ويزرعنى على ارضك ..
ربيع اخضر ..
ومن شوقى . .و حنين قلبى ..بتتنفس
زهور الفل و النرجس ..
جمالك رمز لبلادى ..
عشان شايف حاجات فيكى ..
بقالى زمان بحن لها ..
وبرسمها ..
ولا تكون لى ف احلامى ..
عشان حاسس حاجات يمكن ..
لاول مرة بعرفها ..
وبلمسها ..
و فجاة لقيتها قدامى ..
حاسس بيكى ..
بعيش فيكى ..
و اول مرة اتجنن واتجرأ ..
و اقول ليكى ..
بموت فيكى ..
*****
بحب الكون عشان خاطرك ..
بحب الكون عشان بيكى ..
و احب النجمة بتلالى ..
اشوف الضي ف عنيكى ..
واحب ارسم ..
على وش القمر ضحكة ..
ادندنها ..
ف احلى غناوى باكتبها ..
واموت فيكى ..
بحب الليل على شعرك ..
تسهرنى .. ليلاليكى ..
واحب الشمس تتخبى ..
وتحنى جبينها لعنيكى ..
واحب الفجر بيشقشق .. على خدك ..
ويتوضا .. يهاديكى ..
واحب الصبح اكون حدك ..
اكونلك و اتولد فيكى ..
واحب الخير على كفوفك ..
ده عشق الكون .. ما يكفيكى ..
ومين غيرك ..
اقوله و يمكن اتجرا..
بموت فيكى ..
*****
ده مهما الدنيا بتفرق عيون ياما ..
قلوبنا تملى تتلاقى ..
ومهما العمر بيعدى ..
هتفضل عينى لعنيكى ..
بتتبارك .. و مشتاقه ..
يا احلى ما ليا ف الدنيا ..
واحلى هدية تتلاقى ..
بدوب فيكى ..
واعيش ليكى .. وكلى جنون ..
عشان خاطرك .. الف الدنيا و ارجعلك ..
بحب الكون ..
واشوف فيكى بلاد الخلق تتجمع ..
بلاد السحر ف عنيكى ..
بلاد العشق فوق حرفك ..
بلاد العزة ف جبينك ..
و مهما قبلت اكون ابعد ..
مسيرى ف يوم اموت من عشقى و ارجعلك ..
تحبينى ..
ومهما غضبتى او ثورتى ..
ومهما زعلتى .. او غيبتى ..
مدام عارف بسر القلب راح ارضى ..
واعيش من تانى يا عمرى ..
حياتى سايبها ف ايديكى ..

ده يرضيكى؟؟
اعيش العمر مشتاقلك .. ولا تيجينى ..
ده يرضيكى ؟؟ ..
انام و القانى ملهوفلك .. ولا القاكى ..
تعالى حبيبتى ضمينى ..
ده يرضيكى ؟؟ ..
اسهر ليالى محتاجلك .. ولا تدوبى ..
ف بحر هواكى ترمينى ..
ولا تجينى ..
ده يرضيكى؟؟ ..
اعيش العمر اشتقلك .. و اضحكلك ..
واجيلك ينحنى ضهرى على بابك ..
ولا تجرى .. تحاوطينى ..
ده انا عصفور بزقزقلك لغات الكون ..
وانا العاشق .. وبرسملك ..
يوماتى بدمى اجمل كون ..
واحبك و انكوى فيكى ..
و اضحك و انطلق ليكى ..
بعشق الدنيا .. كلى جنون ..
ولجل عنيكى اتبسم ..
عشان خاطرك ..
انا عاشق بحب الكون ..
*****
عشان خاطرى .. ف يوم عيدك ..
تحلى قيودى باديكى ..
وتدينى امان يروى الامل فيا ..
وتحيي سنين عايشها سكوت ..
فاغنيكى ..
ويملى الدنيا علو الصوت ..
واقول ليكى ..
بموت فيكى ..
*****

طارق المملوك
1-4-2008

قصيدة / هو انتى ليه قاسية كده

هو انتى ليه قاسية كده
*****
هو انتى ليه قاسية كده..
هو انتى ليه واثقة قوى .. ومتاكده .. انى هاضيع ..
مش حاسه ليه انك خسارة تضحكى ..
حب الشتا .. مات ف الربيع ..
مات الرضيع ..
وانتى اللى ضيعتى مش انا ..
فاكره زمان .. مش من بعيد ..
لما التقيتك من سنين او من سنة ..
حيرانه .. تايهه .. بين شطوط ارض الهنا ..
وسط الظنون ..
بين العواصف و السواد سكن العيون ..
وانا كنت تايه جنب منك .. بلمحك ..
رغم ان انا .. ما لمحت ايدى الممدودين ..
صرت الدليل .. بين النجوم المكسوفين..
كنت المعاد .. و بايدى زاد ..
اسهر انام .. اقعد .. اقوم ..
كنت القمر ..
كنت الجنود .. و الدنيا ليل ..
كنت السدود .. كنت البشر ..
ضيعتى عاشق رجعك بر الامان ..
وقطعتى ايد تتمدلك .. توهب حياه ..
ودبحتى قلب بيكتبك .. عمره و هواه ..
عشقك صحيح .. هو اللى تاه ..
بردك قتلنى .. بقسوته ..
طفى الشموع وبحسرته.. كسر قلوع مركب امل ..
قلبى اللى دوستيه بقسوتك .. حبك زمان من غير ملل ..
حتى الضلوع ضاقت ف صدرى اللى اندبح ..
من غير خجل ..
بتحاوط القلب الجريح ..
وبتعصره بضمه قسى ..
ضمة ضريح ..
مقهور يا قلبى ياللى مات ..
من غير امانى .. و اللى فات ..
قول يا زمن .. اصرخ ف قلبى اللى انخدع ..
واكتب تاريخ .. قلب الجدع ...
كل الفصول راح تنكتب ..
ضاع الخريف ..راح الشتا .. هرب الربيع..
قرب يدوب وقت الحساب ..مرعب .. فظيع ..
وبحد سيف .. هايجينا صيف ..
كل الى فات راح ينكشف ..
مين اللى حب .. ومين هرب ..
مين اللى خد .. بعدين غضب ..
مين اللى كان عطشان زمان .. ولما شرب ..
عكر ينابيع الحنان ..
راح تنقلب ..كل الحقايق تنكسف ..
وهاتنكتب..
مين اللى فات ..
مين اللى ضاع ..
مين اللى فينا يتقتل .. مين البرئ ..
مين اللى دمر جنته .. وسكن الحريق ..
مين اللى قاتل فرحته .. ومين اللى صار ..
مذنب اكيد ..
والكل ثار .. يهتف يقول والله حرام ..
*****
هو انتى ليه قاسية كده..
هو انتى ليه واثقة قوى .. ومتاكده .. انى هاضيع ..
هاقدر اعود ..
والنور هايقتل وحدتى ..
هاقدر اقوم من كسرتى ..
قلبى القوى راجع حياته بيكرهك ..
و كتاب حراجه هيتقفل .. وهايوجعك ..
لو لسه فى عروقك ضمير ..
راح تعرفى .. حكم الزمن ..
راح تنتفى ..
راح تختفى ..
عند الشطوط .. و البحر اسود يندهك ..
وف قلب ليل ..
هافضل انا ف بر الامان .. وهاودعك ..
راح تركبى بنفس الشطوط ..
وهاترجعى لنفس المصير ..
بس بحقيقى هاتوحشينى .. واوعدك ..
مش هاوحشك ..
*****
طارق المملوك
15-3-2008

قصيدة / ست البنات

.. ست البنات ..
*****
ست البنات .. سكر نبات ..
معذور يا خلق ان قلت هات ..
طعم المرار .. ف الحلق بات ..
ليلة ويومين ..
صبحم سنين ..
والقلب دايب من ليالى هجرها ..
عاشق سكات ..
وشهور .. سنين ..
عاش فيها .. مات ..
ولا داقش يوم طعم الحنان ..
والليل حزين ..
غربة و حنين ..
فرح .. و شجون ..
عشق .. و جنون ..
وبعاد سنين .. هجر و ظنون ..
والكون يكون .. او لا يكون ..
عشقى حقيقة كتبتها .. لازم تكون ..
امسك قلم .. يكتب الم ..
ينقش ملامح حسنها فوق الورق ..
لما افترق .. يوم سحرها من نينى عين ..
*****
ست الملاح ..
والقلب دافى .. يسكنك ..
حب و غنا ..
عشق و مباح ..
يا ارض سمرا و ضيها ..
نور الصباح ..
عاشقك يا غالية سوسنة ..
حبك يداوى قلبنا .. ننسى الجراح ..
فرح و سعادة .. و انشراح ..
يغنينى عن كل البشر ..
ده انتى الجميلة المغرمة .. حضنك براح ..
*****
احلم ليلاتى .. واسالك ..
غربة سكاتى تقتلك ..
واما الجميلة تندهك ..
تنسى السنين ..
تنسى الحنين ..
وتبات نبات ..
تخلص حكاية سكتك ..
سكر نبات ..
ويا الجميلة المغرمة ..
ست البنات ..
*****
طارق المملوك
23/12/2007

قصيدة / مستحيل

مستحيل

*****
مستحيل ان اللى بينا .. مستحيل ..
مستحيل اقدر اعيش ف البعد عنك .. او اكون ..
مستحيل ارضى الجنون ..
مستحيل يا عمر غالى .. مستحيل ماتحبنيش ..
مستحيل افضل اعانى ويا قلبى ..
مستحيل ماتحسنيش ..
مستحيل تبقى ف عنيا .. وماتشوفيش ..
مستحيل اسمك بيسكن فوق شفايفى .. وماتقوليش ..
مستحيل الخطوة دايما بتسابقنى لحد عندك .. وانت واقفة وماتجنيش ..
مستحيل تبقى ف منامى كل ليلة صورة حلوة .. وف نهارى ماتكونيش ..
مستحيل مين فينا يعشق مستحيل ..
هوا ده نفسه العذاب و المستحيل..
يبقى شوق و موت وغربة .. وليل طويل ..
مش بخاطرى انى ابتديها ..
دى الحكاية .. غصب عنى من البداية ..
بتتولد من غير دليل ..
زى بركان من مشاعر .. زى سيل ..
زى ماية تروى حلقى .. مايه عذبة سلسبيل ..
تطرح الارض الشراقى ..
يتولد عمرى اللى باقى ..
لما اسمع من شفايفك دقة القلب اللى مايل ..
دقة تنهى المستحيل ..
*****
طارق المملوك
10-11-2007

قصيدة / ده عسكر معسكر

ده عسكر .. معسكر ..
ـــــــــــــ
ده عسكر معسكر ..
ف قلبى يعسكر ..
وينصب خيامه ..
يطمنى حبه ..
ويفضل يكسر ..
جميع الحواجز ..
مابينى .. وما بينهم ..
ومهما بعدنا ..
فراقنا .. تاعبنا ..
بيفضل ده حافز ..
اعافر .. و اجاهد ..
يا صابت .. يا خابت ..
وقلبى اللى حابب ..
وساكن .. وثابت ..
ينفذ اوامر .. لاصغر شاويش ..
صفا .. إنتباه ..
عشان يبقى دايما .. بيحيا الحياه ..
*****
ده عسكر .. معسكر ..
بيحمى حدودى ..
ده امى .. وابويا ..
وابني .. و اخويا ..
و بنتى .. و حبيبتى ..
واختى .. وجدودى..
ده عسكر .. ف قلبى ..
عاشقهم .. وحبي ..
لأصغر ما بينهم ..
واكبر ما فيهم ..
بادور عليهم .. وافتش و اطوف ..
اشوف اللى جنبي ..
واتمم عليهم ..
وانادى .. بعيدهم .. بلهفة .. وخوف ..
واجرى ف حضنه ..
واسكن ضلوعه ..
ده صوتهم ساكنى ..
بترسم ملامح .. ولهفة .. وحروف ..
*****
وجودهم بنادق ..
عيونهم بيارق ..
وراية تنور حياتى .. ومصيرى ..
كلامهم .. منافع ..
سكوتهم مدافع ..
يهاجم عدوى .. ومرة يدافع ..
ده ساكن يمينى ..
ده قاعد شمالى ..
وخلفى .. امامى ..
وماقدرش اصرح .. ولا اذكر اسامى ..
دى عيلتى الجميلة ..
دى غاية ووسيلة ..
حبيبتى .. و حبيبى ..
صورهم ف عينى .. وقلبى .. و جيبى ..
*****
ده قائد كتيبتى ..
ووالدى .. وسفينتى ..
وقدوة ..
وحكمة ..
وبلدى .. ومدينتى ..
وذكرى طفولتى ..
براءة .. زمان ..
معلم .. مربي ..
وشاعر .. كمان ..
كانك يا والدى قصادى و معايا ..
وساكن حنايا ..
وتكمل حكاية .. بقالها زمان ..
معايا .. وأمامي .. وجنبي .. ورايا..
و ضلك امان ..
*****
وامى الحبيبة ..
وفرح الكتيبة ..
و حتى ان بعدتى ..
تملى القريبة ..
ومهما سكتى ..
كلامك ساكنى .. يعيش جوا منى ..
سكنتك .. سكنتى ..
ف دمى .. حبيبتى ..
ولحظة ايديكى .. ما تلمس ايديا ..
بتوهب حياة ..
وجوا المرايا .. ملامحك ملامحى ..
تأمن شراعى .. ودفة سفينتى ..
يخليكى ليا ..
يا اجمل هدية ..
وسبيل النجاه ..
*****
يا ملكة .. واميرة ..
يا بختى بحبيبتى ..
دى مالية حياتى ..
دى مالكة فؤادى .. وبلادى و مدينتى ..
تنور كيانى ..
فمعرفش ألاقى ..
كلام او حروف ..
لانك يا قلبى ..
- و مهما أدور .. وافتش و اطوف - ..
ومهما ماشوفشى .. او افضل اشوف ..
لا يمكن الاقى ..
حنانك .. و عشقك ..
وحبك .. وقلبك ..
ومهما تقرب شجونى تلاقيها ..
بتفضل بعيدة ..
لانك فريدة ..
لانك قريبة ..
لانك يا عمرى ..
تملى لقلبى .. لعينى الحبيبة ..
*****
وبنتى .. حبيبتى ..
لسانك بينطق .. يزوق كلامى ..
وضحكة شفايفك .. تنسينى عمرى ..
ولحظة الامى ..
يا حلوة .. كبرتى ..
وقبل الاوان ..
تطوفى .. تشوفى .. بلاد غير بلادك ..
وعايشة يا غالية .. باخر زمان ..
ف قلبك .. ودادك ..
لامك .. لجدك ..
وصحبة جميلة ..
بتسكن بلادك ..
اشوفك يا عمرى ..
يحاوطك ولادك ..
وحبك لوطنك .. وحبك لدينك ..
يعسكر ف قلبك ..
ينور حياتك ..
*****
وضحكة وليدى ..
ده ابنى و حبيبي ..
ده روحى و مِنى ..
وشعرى .. وفنى ..
ومهما احاول ..
أعاتب .. و افكر ..
الاقى عيونه ..
براءه .. و طيابه ..
يابختك يا قلبى ..
بكلمة يا بابا ..
*****
يا بختك يا بختك ..
يا كاتب كلامك ..
لانك بتكتب ..
مذاكر .. و فاكر ..
اخويا .. و اختى ..
يا عينى .. تشوفى ..
وحتى ان ما شوفتى ..
بقلبى .. شايفهم ..
فبعشق صورهم ..
قلقهم و خوفهم ..
لاصغر حكايه ..
فتعبي .. والامى ..
يخليكوا ليا .. لان القضية ..
معسكر يعسكر ..
ف قلبى و حياتى ..
بيحمى سمايا ..
وبكرة .. الحكاية ..
هاتكمل ما بينا ..
ولادى .. وولادكم ..
فرحهم .. فرحكم ..
ويفضل معسكر حياتى .. بيكبر ..
ينور حياتنا ..
ويكتر .. و يكتر ..
*****
طارق المملوك
6-10-2007

قصيدة / لحن عاشق

.. لحن عاشق ..

*****
لسه عاشقك ..
لسه عايشك ..
لسه فاكر ..
رعشة الحب اللى عايش جوا منى..
بحر هادر زى ما هوا .. و من سنين ..
يسكنك ويعيش ف غنوة ..
لحنها مفتاحه دايب م الحنين ..
نوته مكتوبة بدمايا ..
ونبض قلبى ..
ونور عيونى ..
نجمة تضوى ف ليل سمايا ..
بلحن هايم ..
شقشق الفجر اللى نايم .. بين جفونى ..
و ابتسم ..
لما اتولد لحنى اللى دايب واترسم .. ف جفون عنيكى ..
يترمى ف حضنك ياخدنى .. باحلى لمسه ..
لمسة السحر ف ايديكى ..
تتقرى الكلمة ف شفايفك .. اغلى همسه ..
وابقى لامسك .. وابقى شايفك ..
تتولد دنيا ف عينيكى ..
دنيا جدرانها بهواكى..
عشت بيها ..
عشت فيها ..
عايشه فيا وجوا منى ..
بس قولى .. ازاى وامتى ..
اتبنت جوايا دنيا .. باسمك انت ..
من سنين عشقك بانيها ..
وحتة حتة ..
ركن ركن ..
وحارة حارة ..
شكلها من صورتك انتى ..
حِسَها من قلبك انتى ..
ولا صوتها و ضحكها .. من لحنك انتى ..
لحن قلبك ..
اتولد وقت اما قابلك ..
عيشي قلبى .. واسكني بالعشق حبي ..
دى البيوت تسكن صحابها ..
و الشوارع تمشى فيهم ..
والدروب تتغنى بيهم ..
لما تنده .. تتولد فرحة ف عنيهم ..
والاماكن عاشقة صوتهم ..
تنكوى ف البعد عنهم ..
مدى ايدك .. خطى قلبى ..
عيشى دنيا بنيتها ليكى ..بيوت .. مداين ..
و اللى ساكن جوا منها ..
هو انت ..
ايوة انت .. ومين سواكى ..
يحضنك قلبى و يرفرف فوق سماكى ..
تسكن الفرحة ف هواكى ..
ابقى مين ؟ ..
ابقى اللى عاشق ..
واللى سهمك جوا منى ..
رغم بعدك .. لسه راشق ..
*****

طارق المملوك
8/5/2007