شريط اخبار شخبطة ملوكى

الخميس، مايو 19، 2011

وهانعمل ايه ؟؟ !!

وهانعمل ايه ؟؟ !!
****
و هانعمل ايه ؟؟!!
طول ماحنا سايبين فى البيوت خفافيش ..
بتنهش لحمنا البالى..
طول ماحنا راضيين بالنواح.. ونقول ياعمنا..
طب وانا مالى ..
لو جه ماجاش .. مايهمنيش ..
كون انصلح .. او كان بلاش ..
تفرق ف ايه ؟
مبسوط كده .. وعايش انا ف حالى..

وهانعمل ايه؟ ..
انا بيهمنى .. ايه هايجرالى ..
عايش كده .. واهه هو ده حالى ..
بسعى ورا لقمه ..
اجيبها م النجمه ..
بسعى ورا هدمه .. تستراذى عيالى..
قال الخبيث حكمه ..
"هايجينا بكرة بايه؟..
جاى بدموع ف عنيه..
خايف .. جبان و ضعيف ..
شايل كفنه بايديه ..
وشمسه طاقة موت ..
وبعد بكره يفوت ..
وكل يوم بنموت ..
نغرق ف كون عتمة ..
تفرق ف ايه يا ناس .. اهى و السلام خاتمه "..
اعقل كلام الخوف ..
واعرف و بوص و شوف..
نخرص .. يموت الصوت ..
وكل يوم هانموت ..
وموت يجينا بموت ..
اعمل لبكره يكون..
اخلق له طاقة نور ..
اصرخ .. و جاهد .. كون ..
إملى البراح و الكون ..
تحضن ايدك ايديه ..

و هانعمل ايه؟ ..
دى الرجل مش شايلة ..
والعافيه راحت فين .. ف السجن مش طايلة ..
حابسه دموع العين .. جوا السواد و الليل ..
حلم الغلابة بعيد .. اصل النجوم عالية
والصوت طريد القهر .. و الكلمه مش قايلة ..
سجانا مش انسان .. ميت ف عينه الضى ..
وهايعمل ايه وازاى؟ .. ده زمانه بكره جاى ..
ده حاشية عايزة الحرق .. مالهم ف بكره زى ..
ده بكرة جايب سيف ..
للدنيا نازل ضيف ..
ييجى المسيح الحى ..
والكمة وسط الفضا ..
تزعق بميت رنه ..
حلم الرضيع مشروع .. وكلامه يتغنى ..
تحلم بيوم هاتكون .. والخلق تستنى ..
اخلق لحلمك كون .. الارض مش جنة ..

وهانعمل ايه؟
وايدين تروح ع الخد ..
اخر زمان يا خلق ..
الاخ يسرق اخوه ..
ماحد ينفع حد ..
والابن يتقل ابوه ..
ومافيش عقاب و لا حد ..
يا خلق فوقوا يا هو ..
ولاييجى يوم الرد ..
الظلم بينا جابوه ..
و السيرك يوم نصبوه ..
بلياتشو بيلعبوه ..
القرد راكب فيل ..
وغراب وصوته جميل ..
وحيه ترقص رقص ..
ادى اللى كان ناقص ..
ونقص يولد نقص ..
دور البطوله باعوه ..
مقلب وجربتوه ..
واللعبه قلبت جد ..
سيبوا الايدين ع الخد ..
يا تفوقوا بقى وكفاية ..
قمرنا شاخ و اسوًد ..

وهانعمل ايه يا خلق؟ ..
الضعف هو العيب ..
نخرس يزيد الظلم ..
نصر الغلابة قريب..
نروى غيطانه بدم ..
وبكره ياما يجيب ..
ياخد معاه الهم ..
تضم ايدنا ايديه..
تحضن عيونا عنيه ..
لما هاننسى ف يوم..
كلمة هانعمل ايه؟
****
طارق المملوك
11-5-2010

هناك تعليقان (2):

maha bahnassi يقول...

الأستاذ الفاضل /طارق المملوك

تحية طيبة
أقوم بإجراء دراسة عن المدونين فى مصر فى إطار رسالتى للماجستير ،وأتشرف بإضافة مدونتكم فى عينة المدونات الخاصة بى ، وأرجو من سيادتكم ارسال بريكم الالكترونى للإجابة عن استمارة الاستقصاء ، وسيكون لكم جزيل الشكر على تعاونكم واهتمامكم ، وأتشرف بالرد على أى استفسار بخصوص طلبى .

مع شكرى للاهتمام والتعاون مرة أخرى
bloggingsurvey@yahoo.com
مها بهنسى المعيدة بكلية الإعلام-جامعة القاهرة

maha bahnassi يقول...

استاذ طارق
مازلت انتظر رد سيادتك لتزويدى بعنوان البريد الالكترونى للاجابة على استمارة الاستقصاء الخاصة بى ، وانا مهتمة بمدونتك ولذلك ارجو منك مساعدتى .
bloggingsurvey@yahoo.com
مها بهنسى
معيدة بكلية الاعلام جامعة القاهرة