شريط اخبار شخبطة ملوكى

الأربعاء، مارس 07، 2007

شخبطة ملوكى .. المصريين و اهل الكهف

شخبطة ملوكى .. المصريين و اهل الكهف
*****

اختنا فى الله انجى الفاجومية سالت سؤال
هو مافيش امل خلاص و الناس مابقتش عاوزه تعمل حاجة؟
مين السبب .. طيب نعمل ايه عشان بلدنا ترجع منورة تانى؟
لا طبعا فيه امل ده الطبيعى بس الامل محتاج عمل
يبقى لازم نتغير نتغير ازاى بقى؟
اعتقد ان الشعب زى مانت قلتى مش قادر يعمل حاجة بيتفرج مابيصلحش
عارفه ليه الشعب عاوز يجهز انه يقدر يغير و يصلح
الناس ماتربتش على اخذ القرار و التفكير العلمى وماعرفوش هما واجباتهم ايه ولا حقوقهم ايه
ماتربوش على العمل الجماعى من صغرهم و تحمل المئوليه واخذ القرارات
يعنى مثلا خدى عندك ابسط حاجة اللحوم تغلى و السمك و الالبان ومافيش اى رد فعل، الناس تقعد يومين ماتشتريش السلعة دى و بعدين هوب كله يجرى يلحقها قبل ما تغلى تانى ، و طبعا التجار عارفين ده كويس جدا وعارفين اننا مش اصحاب قضية و عمرنا ما هنعمل زى الانجليز و نخلى السمك يعفن عن التجار لو زودوا تعرفيه
يبقى المشكله فيها جزء كبير عندنا ، مشكلتنا اننا بنستغل بعض واى حد يقدر يدخلنا فى صراعات جانبية يلهينا يبها ، رئيس نادى حقير رمه ممكن يعيش الشعب بحالة سنة مايتكلمش الا فى الكورة و الحكومة تاخده ستارة كبيرة لعمايلها السودا
بطوله كورة شرحه نقعد نتكلم على تجهيزها كتير ، الجديد بقى الفتاوى الخكومة بقت بتستغل الفتاوى عشان الناس تقعد تتناقش فيها و يجيبوا سية الشيخ و المذيع وازاى قعدوا يتكلموا فى القضية الفلانية و الفتوى دى يصبح ليها معارضين من الناس البسيطة اللى على قد حالها ومؤيدين من جنود الاعلام الثقافى الجديد اللى هو فى الحقيقة مش ثقافى بناء ده جاهل هدام ، المهم الشعب و بعض الاقلام يدخلوا معارك جانبية تنسينا القضايا الحقيقية اللى احنا عايشينها
ولو خلصت الكورة و الفتاوى يطلعولنا فى ايمن نور و تزويره او نعمان جمعة و جنانه او قضيه زى بتاعت المذيعة ام فتكات اللى بتاجر البنات وتعمل الحلقات و تمنع الدوخان وريحة الدخان
يا ايها الشعب المغيب فوق .. اصحى ..
على راى سيد درويش قوم يا مصرى مصر دايما بتناديك
خد بنصرى .. نصرى دين واجب عليك

فوقوا .. فوقوا لاننا نمنا و غيبنا و اصبحنا كأهل الكهف
غيبنا عن العالم سنوات و قرون ومابقيناش عارفين نتعايش معاه
يا نفوق و نبطل تقليب ونعيش و نتعايش مع العالم بنظرياته و سياساته وندوب فيها سواء بالفض او القبول مش مهم المهم نتعايش و يكون لينا موقف و شكل و طعم و لون ومانعملش زى اهل الكهف ويكون العلامة الوحيدة اللى بتبينا صاحيين او تخوف الناس انها تهجم علينا حتة كلب ولامؤاخذه

اقول قولى هذا و استغفر الله لى و لكم
*****
طارق المملوك
7-3-2007

هناك تعليقان (2):

rania يقول...

كلامك رائع بس بردة عايز الشعب يفوق و مش يبقى زى اهل الكهف
جميل قوى بس يعنى الى فاقوا بقوا فين دلوقت
؟
اكيد انت عارف
دة الحكومة بتبذل اقصى جهدها علشان بس يفضل الشعب نايم
و محلك سر
بيطلع على جتنته البله
و مخلياه يمشى فى الشارع يكلم نفسة
يبقى يفوق ازى؟
بص انت عايز تفوق اوك
قلبى معاك ان كان هينفعك
بس بصراحة يعنى انا اخاف و خصوصا ان ايدهم تقيله قوى و مش بيفرقوا بين الراجل و الست
حسبى الله ونعم الوكيل

Pakinam Nasser يقول...

انا معاك فى للى انت قلته ، و الافاقة هنا متنفعش انت بس او انا بس او فلان بس ، ده لازم الشعب كله يفوق ، بس للاسف المخدرات كتير او بمعنى اصح هى عصاية الشعب بيضرب بيها على دماغه ، كل ما يفوق يتضرب تانى ، عصاية اسمها ثانوية عامة و عصاية اسمها سنة سادسة و الكورة و الفتاوى و ايمن نور و و و ، الحمد لله عصيانهم مبتخلصش