شريط اخبار شخبطة ملوكى

الأحد، مارس 11، 2007

قصيدة / وش القمر

.. وش القمر ..
*****

وش القمر .. طالل حزين ..
طفى شموع نور الضيا .. ع المحتاجين ..
على مصرنا ..
على ارض كانت طيبة ..
مرت سنين..
صبحت وشوش كل الوطن ..
طافية و عابسه .. مكشرة ..
ساد الضلام ف وشوش جميلة مأصلة ..
سكن الملامح .. والشفايف و العيون ..
ساد الضلام ..
والعتمة صارت مننا ..
جوا البيوت ..
بين الحوارى و الشوارع .. و الشطوط ..
واتارى نور ارض الوطن ..
كان اصله نابت مننا ..
من ضحكنا .. من حرفنا ..
داير مابينا ف حينا ..
يضحكلنا ..
ينور لنا ..
عتمة عبوسنا .. و قهرنا ..
بنكته دايره ف ارضنا .. فوق الشفايف تترسم ..
وبتبتسم ..
نسمعها ضحكة منورة .. فوق الوشوش ..
نلمحها نور شمس النهار ..
على نهرنا ..
على شط وادي مننا .. مليان خضار ..
على مايه سارحة ف الغيطان ..
تروى بحياتها زرعنا ..
وتصير شموس .. و تصير ضيا ..
و تصير مابينا ضحكة راسية ف وشنا ..
و تصير نهار ..
قوم يتملى رمل الصحارى .. بالكنوز ..
ويا النعم .. ويصير عمار ..
من ضحكنا .. يدور المكن ..
ويكون لنا هو السند ..
ورث البنات .. ورث الولد ..

*****

ده المصرى عاشق ضحكته ..
عاشق الحياه ..
عاشق العمار ..
عاشق تراب ارض الوطن لون الخضار ..
حتى الشهيد لو شوفت قبره تلمحه ..
ساعة ما مات لجل الوطن ..
حاضن سلاحه و ضحكته ..
وعيونه على بكرة اللى جاى .. متاكده ..
وعشان كده ..
وش القمر ..
عاشق الولاد ..
لما تشوفه بطلعته ..
برطم .. رطن ..
خبًا ضياه بين الصخور .. مات و انقهر ..
لما انطفى وش الولاد ..
مستنى يوم يجيى المعاد ..
بينا و بينه .. و طلته ..
ترجع وشوشنا تبتسم ..
ترجع حياتنا تترسم ..
يحيا الوطن ..
*****
طارق المملوك
10-3-2007

هناك 7 تعليقات:

Mohamed A. Ghaffar يقول...

انا زرتك على فكره كذا مره بس مكنتش بعلق

فعلاً يحيا الوطن

Pakinam Nasser يقول...

لوحة رائعة ، وصف رائع و كلمات رائعة ، اعتقد انك رسمت لوحة متكاملة و استخدمت فيها جميع الالوان و قدرت من خلال الكلمات البسيطة ذات المعانى العميقة ان تعبر عن معانى كثيرة و جميلة ....استطعت ان ترسم وش المصرى الاصيل بكل ملامحه و تعبيراته ، فعلا صورة رائعة

مش فاهم حاجة يقول...

طارق باشا
صورتك جميلة اوى
ومصر هاتفضل وش القمر
حتى لو رفض القمر

شخبطة ملوكى يقول...

محمد عبد الغفار
اسعدنى مرورك كل السعادة
و اسعدنى ان اعرف انك متابع لمدونتى فرايك الكريم يهمنى دائما
اشكرك اخى العزيز

شخبطة ملوكى يقول...

اشكرك يا باكى
جميل ان تصل المعانى و الصور كما يرسمها الفنان بريشته و تقبع فى القلوب كما رسمها وكما يريد من ايحاءاتها

شخبطة ملوكى يقول...

مش فاهم حاجة
اشكرك على كلماتك الرقيقة ومرورك العاطر الذى اسعدنى من صاحب حس مرهف و قلم رقيق

احمد عزام يقول...

غاب القمر بين الضباب
وش القمر نهشوه الكلاب
ارض القمر صبحت خراب
وكل اللي كان ايام زمان
راح في الغناوي وكان وكان
حتي الخلاص مش جاي خلاص
وارض القمر .......ضاعت خلاص