ننتقل إلى إذاعة خارجية

ننتقل إلى إذاعة خارجية

*****

فكرة جميلة طرحها أخونا أيم قاسم فى مدونته قاسم أفندى وصف تفصيلى لمباراة كرة قد بين الفريق العربى و الفريق الاسرائيلى لكرة القدم

توقف الوصف التفصيلى عند الدقيقة 1973 ونقل أخى العزيز ايمن قاسم الميكروفون من يد قاسم افندى الى يد شخبطة ملوكى و المباراة فى شوطها الاول

اليكم تتمة الاحداث

*****

سيداتى انساتى سادتى.. نطمنكم على ان الكابتن لطيف معاكم مرة تانية بعد ازالة التشفير و الاتفاق مع الامير اياه على دفع مقابل مادى لنقل المباراه للجمهور العربي العريق .. و بنجب نطمنكم ان الكابتن لطيف بخير وان اللى جاله كان مجرد اغماء من فرحته بالهدف اللى احرزه الفريق العربى .. وينتقل الميكروفون اليه مباشره من استاد الوطن العربى ..
سيداتى انساتى سادتى كابتن لطيف يحييكم وينقل لكم باقى احداث الشوط الاول .. بعد الدقيقة 1973 التى شهدت الهدف الاول للمنتخب العربى قام كابتن الفريق العربى بمصافحة كابتن الفريق الاسرائيلى اللى حب يورى العالم كله انه عنده روح رياضية عالية جدا وطبعا الكل عارف ان الكابتن ده كان عاوز يحترف بره وشاف ان المصافحة دى ممكن تفتحله ابواب الاحتراف .. الكابتن العربى خد كابتن الفريق الاسرائيلى فى حضنه بيواسيه و بيطبطب عليه مشهد رائع الناس حوالين شاشات التليفزيون مش مصدقين برافو يا كابتن ..
غريبة قوى يا جماعة الناس تسالنى ايه الغريب يا كابتن لطيف ؟ ..اقولكم ايه الغريب ..الفريق العربى متضايق من الكابتن و المدرب بيشاورله يطلع من الملعب بتغيير اول لكن الكابتن مش عاوز يطلع من ارض الملعب وفضل متبت وواخد كابتن اسرائيل و عمالين يضحكوا وكل ده فى وجود الحكم اللى واقف فى وسطهم بيضحك و بيحضنهم الاتنين .. و الماتش واقف بس الفريق العربى بيكمل لعب و فاكر انه من غير الكابتن هايعرف يجيب جون و الحكم مش واخد باله ..
ياااااااااااااااااااه تصدقوا الحكم مش موافق على التغيير و مش راضى باى كابتن تانى وبيقول ان التغييرات فى المتشات العدائية دى غير مسموح بيه الا فى حالة الاصابة الجسيمه وده من حقه لان الحكم هو قاضى الملعب وله مطلق الحريه فى سن القوانين الخاصة بالمباراه والله مانعرفوش انه كل ده مذكور فى العقد اللى وقعه الفريقين قبل الماتش ..
المهم الحكم اتصاحب ع الكابتن العربى واخد الكورة و قال كل فريق يرجع فى نص ملعبه عشان الشوط الاول خلص ..
واحد يسالنى يا كابتن لطيف ايه رايك فى الشوط الاول .. اقوله الحمد لله اننا قدرنا نحسن النتيجة و نطلع واحنا جايبين جول ممكن يرفع معنوياتنا .. بس لازم الفريق العربى يقعد مع الكابتن لانهم مابيباصولوش الكوره و متضايقين منه قوى .. الكورة لعبة جماعية و الكوره اجوال ومش هانعرف نجيب اجوال الا بروح الفريق ...
*****
الشوط الثانى
*****
فيه ايه يا كابتن ؟ .. معقول ..؟ سيداتى انساتى سادتى المخرج مكمل معانا على الهوا و بيبلغنى ان بين الشوطين و فى غرفة خلع الملابس اتخانق الفريق العربى مع الكابتن و خرجوه بره الاوضه .. ليه كده بس يا ولاد .. والراجل ماصدق خرج ياخد الدش بتاعه و تعليمات الشوط التانى فى غرفة الفريق الاسرائيلى اللى استضافه و سابه يشرح خطة الشوط التانى على السبورة اياها وشرحلهم اسلوب لعب كل لاعب بالفريق العربي .. و الحكم كان قاعد برضه معاهم و بيشرب بيبسي عشان يبرد نار الغيرة ..
برضه الامن بيقولى ان الفريق الاسرائيلى لمح واحد من الفريق العربى ماشي فى الممر اللى بيودى على الملعب و معاه بمبه من اياهم اللى بيفرقعوها بعد الاجوان قام جريوا وراه خبطوه على قفاه وهو مديهم ضهره .. ففرقعت البمبه قدامه الراجل اتخض و سكت و محطش منطق وسمع الفريق العربى صوت الفرقعه بس فضل ساكت ملتزم بضبط النفس اللى ايده الحكم و اشاد بيه الاعلام .. لانه مردش على الاستفزازات اللى بيشوفها من الفريق الاسرائيلى وبرضه الجمهور قعد يهمس مش مصدق اللى حصل فاتكتم وقعد ساكت ..
ثوانى اعزائى المشاهدين و هايبتدى الشوط التانى .. ايه ده .. ليه كده بس احنا بنقول اننا جمهور متحضر .. واحد من جمهور يمين المقصورة رمى طوبه جت فى كابتن الفريق العربى اللى كان نازل مشبك ايه فى ايدين الفريق الاسرائيلى و الحكم .. وقع و الطوبة جابته الارض محطش منطق الدنيا هاصت والغريب ان اللى زعل جمهور الفريق الاسرائيلى مش العربى لان الفريق العربى كان قرفان من الكابتن ولا كان بيباصيله كورة ولا بيتكلموا معاه .. علطول مدرب الفريق العربى جهز لاعب بديل وخلاه كابتن الفريق العربي كمان لانه بيلعب فى نفس مركز الكابتن اللى انصاب ..
نزل الكابتن الجديد بنفس الاسلوب سلم على كل لاعبي الفريق الاسرائيلى وعلى الحكم و لف يسلم على لاعيبة فرقته يعنى سلموا ببرود وحاول الكابتن الجديد انه يكلم اللاعيبة كلها و يتفق معاهم و فعلا حصل الاتفاق على خطة الشوط التانى وبقياده الكابتن الجديد اللى برضه كان علاقته بالحكم كويسه الى حد ما قدر انه يلم الفرقة و يروح للحكم و يعتذر على اى مضايقة اتسبب فيها االفريق العربى و كل لاعب سلم على الحكم و قاله خف علينا بقى انا هاسمع الكلام بس مش عاوز اخرج من الملعب عاوز اخلينى موجود لحد ما نفسي يجيب ولو يعنى تعبت خلى الواد الفلانى اللى على الخط ده ينزل مكانى اصله ابن اخويا لزم وغالى عليا و انا مكلمه هايسمع كلامك برضه.
قشطة جدا والجو جميل و رائع زى الطقس النهارده تمام بيبدا الشوط التانى و الحكم علاقة ظريفة بلاعبي الفرقتين بدا الشوط التانى من المباره بجس النبض و الدقايق بتمر ممله جدا و الكوره فى وسط الملعب بس الفريق الاسرائيلى مركز هجومة من العمق بعد ما كان بيلعب على الاطراف تكتيك جديد ده ولا ايه؟ هانشوف مع بعض
الفريق الاسرائيلى مهدى اللعب قوى من كل الجهات مع ان الباكات كانوا مستعدين لهجوم الاطراف بس الضغط زى ماقلنا من العمق اللى فيه لاعب كبير فى السن والله الجول الاول جه من عنده وهاتك يا تكسير و ضرب فيه وباقى المراكز هادية حاجة غريبة جدا المدرجات اللى ورا مرمى الفريق الاسرائيلى دى كانت من عيله اللاعب اللى فى العمق بتاعنا اللى نازلين فيه ضرب الله الله ليه كده بس ليه بس كده المدرجات دى هاتك يا تكسير فى الكراسى و حدف طوب على الجول بتاعهم يا جماعة مش كده دول عاوزين يبوظوا الماتش اللاعيبة كلها حتى اللى بينضرب راحوا يهدوا الجمهور و من المقصورة راح كبار المدعوين و الكاميرات بتصور و المخرج مركز على الجمهور اللى بيحدف الطوب .. مش كده يا جماعة الماتش هايبوظ والمخرج مركز معاكم يا اخى مع انه ماجبش اللاعيب بتاعنا وهو بينضرب و الحكم شايف و مطنش .. الكادر متسلط عليكم وانتوا بتشتموا و مخبيين وشوشكم عشان الداخليه ماتقبضش عليهم بعد الماتش ايه ده ايه ده اللاعيبة الاسرائيليين من بره الكادر بيحدفوا الجمهور اللى هايص بالالعاب النارية اللى بيتجيلهم من مدرجاتهم بقى ده اسمه كلام لالالالالالالا
المهم اتدخل الامن دخل و حجز على الجمهور اللى هايص و حاوطه من كل ناحيه و منع الطوب من عندهم و مع كل ده الاسرائيليين لسه بيحدفوهم بالالعاب النارية برضه مش سايبينهم .. يا خبر ابييييييض كتير من الجمهور انصاب من الالعاب النارية دى و بينقلوهم المستشفى عموما نشكر الساده المسئوليه لهمتهم .. لفته طيبة برضه مناللاعيبة الاسرائيليين انهم بطلوا تحديف الالعاب الناريه و الاسعاف بتشيل المصابين وبنحييهم على روحهم الرياضية دى
نرجع للماتش اللى استانفه الحكم علطول وهجمه من الفريق العربى على غفله كده من اللاعب الجديد حسب الله اللى متصعد من الناشئين الولد هايل يا جماعة اخد الكورة لوحده و الفريق العربى كله بيشتمه لانه مش بيباصى الكورة وهى دى .. هى دى .. والله الله الله جوووووووووووول جول جميل من حسب الله اللى حجز على كورته و شغال بكوعه و رجله .. مش بقولكم هى دى .. بصراحة ولد هايل جسم لعيب كوره تمام الولد ده مع ان سنة صغير و بكده تكون النتيجة 4/2 و الماتش لسه شغال وحمى قوى و الاسرائيليين مركزين على حسب الله جامد قوى استفزاز و ضرب من ورا الحكم و هو بجد عاقل قوى الولد ده دخل عليه 3 خطفوا منه الكورة و وقعوه بين رجليهم و هاتك يا ترفيس الولد لم نفسه و قام ومشي بالكورة تانى نفس السيناريو و عاوز يجيب جول وعاوز يجيب جول ... جوووووووووووووول هدف تانى للفريق العربى اللى نازل شتيمه فى حسب الله مع انه جابلهم جونين فى 5 دقايق ... وجروا على المدرب بيقولوله طلعه لامؤاخذه .. المدرب مش مصدق .. النتيجة 4/3 وفاضل جول و نتعادل ..
ايه ده الفريق العربى مش عاوز يكمل .. الله ايه اللى انا شايفه ده الفريق قعد فى منطقة ال 18 على الارض ومش عاوزين يلعبوا و الحكم واقف مستنى الفريق العربى قاعد و الكابتن رايح جاى ومعاه اتنين تلاته من اللى يعرفوا الحكم بيهزروا معاه و الحكم بيضحك و بيبوص ف ساعته و الكابتن بيسال الفريق الاسرائيلى انه يخف شويه على اللاعب اللى فى العمق و يخلوهم مع حسب الله لانه بيكرهه ..
اوبا الحكم بيغمز للفريق الاسرائيلى الكاميرا اهه مركزه معاه تمام و بيبوص ف ساعته و بيشاور بصوابعه لامؤاخذه فاضل 10 دقايق بس و ينتهى الماتش الحكم رمى الكوره وراه ناحية الفريق الاسرائيلى و بيكلم لاعيبة الفريق العربي و الفريق الاسرائيلى بيبوص للكورة و الفريق العربى ولا هنا الجمهور هايص بيقولهم العبوا الكورة معاكم ..
و بيصرخوا عاوزين جول عاوزين جول ... مش عارف هانفضل كده كتير ولا ايه الفريق الاسرائيلى عاوز الكورة يجيب الجول الخامس عشان يطمن جمهوره ويقضى على امال الفريق العربى و الجمهور العربى عاوز ينبه فرقته ان قدامهم فرصه يباغتوا الفريق الاسرائيلى و يتعادلوا و يلعبوا على الهدف الذهبى اللى هايبقى سهل بعد كسر معنويات الفريق المنافس بس الفريق العربى مش مركز معاه..
هانستنى كتير ولا ايه؟؟؟ مش عارفين الحوار مع الحكم هايوصلنا لايه هانقدر ناخد احنا الكورة و نتعادل ولا الفريق الاسرائيلى يسبقنا و يجيب الجول الخامس؟
ده اللى مستنيينه مع بعض فى ال 10 دقايق اللى فاضلين..
*****
طارق المملوك
21-3-2007