شريط اخبار شخبطة ملوكى

الأربعاء، سبتمبر ٢٧، ٢٠٠٦

مملوكيات - 5 / سلملى على نوى المشمش

مملوكيات - 5 / سلملى على نوى المشمش

عندما تتقدم الدول عادة فى طريق التقدم للحاق بركب التحضر دائما ما تسعد الشعوب ، لانها بلدهم تلك التى تنهض و يكبر اسمها ، وتتفاخر بتقدمها و بابنائها ، فتلك هى مفاخر الشعوب ، علماؤها و تقدمها هو المعيار و المقياس ، و بطبيعة الحال التقدم فى مجالات الطاقة هو المحرك الرئيسي الان لكل دول العالم والاحداث العالية ، فتوفير مصادر طاقة جديدة هو الخطر القادم ويأخذ الاولوية الاولى على الساحة العالمية ، بعد ان كانت الاولوية فى السابق للمياه و مصادرها بلا جدال.
الفترة الماضية قرأت و سمعت خير اللهم اجعله خير اننا هانصحى وندخل عصر الطاقة النووية ، ومين يا جماعة اللى قال : ده ولى العهد بجلالة قدرة يعنى مش وزير الطاقة ، ولا رئيس الوزرا ، ولاحتى رئيس الجمهورية ، وشوف الصياعة يعلن فى مؤتمرالحزب الوطنى شوف يا اخى الدعايه وكان الوطنى محتاج دعاية يكسب بيها شعبية ، البعض يسألنى طاقة ايه اصلا طاقة نور يعنى ونوويه ليه ؟ نووية ده اسم واحده ولا يعنى اشتقاق من نوى البلح او المشمش ، والله مش عارف اقولكم ايه ؟ اقولكم فى المشمش لو عرفنا نعمل حاجة ، طالما شعبنا الغلبان مايعرفش يعنى ايه لحمة و فراخ ، ويعنى ايه كسوة و هدمه جديدة ، يبقى عمره ماهيعرف ولا هايهمه يعرف يعنى ايه طاقة نووية ، او ايه الفرق بين استخدام الطاقة دى سلميا او عسكريا.
انا سمعت كلام من الناس البسيطة يشيب - على راى المرحوم توفيق الدقن - ، الكل بيقولك هو ايه الخراب اللى هاينزل علينا ده؟ ، معقول هانبقى زى ايران ويتفرض علينا حظر ، او يحصل فينا زى العراق وامريكا تدخل مصر ؟.
كلام كتير عن احتلال و حصار ، وكلام عن مخطط مدروس لتقسيم مصر ، وحكم ذاتى للاقباط فى الجنوب ، وهما بيحطوا حته الجبنه فى المصيدة عشان ندخل برجلنا، ولا نكونو مثلا بنبتزهم ، يعنى يقولولنا مثلا طيب هانسيبلكم غزة قصاد انكم تتنازلوا عن برنامجكم النووى السلمى ، وقال يعنى احنا ناقصين هم مثلا فوق همومنا .
المهم انا جاى بس اطمن الكل ان الاخ المندوب السامى - اقصد ريتشاردونى سفير الولايات المتحده فى مصر - بارك تنفيذ المشروع واعلن فى اكتر من مكان وفى اكتر من تصريح ان امريكا تبارك المشروع ، تبارك على ايه مش عارف هو احنا هانتجوز او اتخطبنا لامريكا ؟ مش عارف، المه مانه مش معترض يعنى و بالرقاء و البنين و السكوت علامة الرضا و كله فى التمام ، و ربنا يتمم لنا بخير ومحدش بقى يقعد ينبر لنا ففيها و يتوقع البلا قبل وقوعه ويفضل يرسم سيناريوهات مضلمة و سودا عليه وعلى اللى خلفوه ، هى مش ناقصه نكد ، يا سيدى عيشنى النهارده وموتنى بكره.
مش عارف ايه العالم الفقريه دى بقالهم سنين بيزنوا على البرنامج النووى و اشمعنى احنا و خلافه ، ولما نيجى نعملعل يكشوا زى الفراخ ، اللى يقولك يا عم احنا عباراتنا بتغرق و قطارتنا بتخبط ف بعض و بتولع عادى ، فما بالك بقى بمفاعل نووى يتنيل على عين اهله و ينفجر زى تشيرنوبل ، وتبقى طارثه بجد مع الاكل المسرطن و المايه الملوثه تبقى كملت بجد ، ولا ياعم هى مش ناقصه لحسن اسرائيل تطلع تضربهولنه زى ما عملت فى العراق و الكل سكتم بكتم ، وتبقى فلوسنا راحت بلاش ، وواحد يقولك يا عم توكل ، كله خير اصل انت مش عارف - وهيبدا يحكيلى حكاية المطار السرى - اصلهم عندهم برنامج تصنيع اسلحة دمار شامل ، و فاضلهم تكه خلاص ، وهاوزين غطار يخفوا وراه تجاربهم ، وتوقع خلال سنتين ولا حاجة مصر تعمل تفجير نووى تجرب بيه القنبله النووية بتاعتها ، انت مش عارف ان صدام هرب علماؤه لمصر و ليبيا ، وان ليبيا ساعدت مصر بالعلماء الروس اللى عنده ، حميد شارابوف و عبد التواب خارابوف و زكريا بلاييف ، دول العلماء الليبين اللى اسلموا واخدوا الجنسيه هنا ، بكرة يا عم نبقى زى باكستان او الهند ، وندخل نادى النووى ، يا خوفى لنطلع مش مشتركين وناسيين الكارنيه ، وناخد علقه على باب النادى.
يا جماعة الخيوط متشابكة جدا ، اصبحنا لا نعرف ما هى المصلحة وماهى الخدعة ، اصبحنا نخاف من اى خطوة نقدم عليها حتى ولو كنا متاخرين بها اكثر من نصف قرن او على الاقل 40 سنة ، اللى قدنا زمانهنم متجوزين و عندهم عيلين قصدى اللى زينا وصلوا من زمان الهند و كوريا و ايران و غيرهم
سلملى على الزعامة وعلى شعله الحضارة اللى انطفت من زمان....

طارق المملوك
27/9/2006

ليست هناك تعليقات: