قصيدة / شوفتى إزاى

... شوفتى ازاى ...

اكتر قلب ف كل العالم ..
حاسس بيكى ..
اكتر قلب ف كل الدنيا ..
بيعشق اسمك .. يفرح ليكى ..
عارفك ..
عارف كل اغانى العشق .. اللى حفظتيها ..
حافظك .. كلك ..
حتى لحد ادق ملامحك ..
كل ما فيكى .. وصف عنيكى ..
رمش برمش .. كانه قصادى ..
وقدام عينى ..
حتى الضحكة اللى ترسينى ..
لسه شايفها ..
سامع رنة صوتها بودنى ..
بتسرى ف دمى ..
نبض حياتى .. رغم مسافة بتفصل بينا ..
رغم حدود و بحار و جبال ..
بتفرق بينا ..
ميت مشوار و سدود و محال ..
لكن عارفك .. حافظك .. شايفك ..
رسمك صورة ..
مهما تروحى بعيد عن عينى ..
ساكنة عيونى ..مرسومة جوا النيني و قافل ..
رمشي عليكى ..
لما بنام وبشوفك حلم ..
ولما بفتح عينى واشوفك ..
قدام عينى حقيقة .. برئية ..
وضحكة تنور يومى الجاي ..
شوفتى ازاى ؟؟؟...

عارفك .. حافظك ..عارف كل اللى تحبيه ..
لون فاستينك ..
قصة شعرك ..
كل مكان ممكن تزوريه .. او بتحبيه ..
لما بتتعبي قلبى ياخدنى ..
واجرى و اسيب الدنيا بحالها ..
واجرى عليكى ..
تجرى لحضنى ..
بين درعاتى اضمك و اخدك ..
دنيا بتاعتى .. وانتى اميرة ..
قلبى لوحدك ..
وافضل افكر .. وانت قصادى ..
ازاى ممكن ارسم صورة ..
وافضل اجمع كل ملامحك ..
ارسم قلبك ..ورده تعطر كل الدنيا ..
وتشفى عليل ..
ارسم عينك نبع و صافى ..
وخضرة و نيل ..
اما شفايفك .. لحن و غنوة ..
و سحر الليل ..
اسمع منها .. ادوب ف عنيكى ..
ف لمسة ايدك .. سر جميل ..
صدقتينى .. لما باقولك ...
ان انا حافظك .. عارفك .. شايفك ..
قدام عينى ..
لما بفتح عينى الصبح .. وقبل ما انام ..
حتى ف حلمى .. وقلبى و روحى ..
وجوا الدم بتجرى تروحى ..
لجوا القلب ..
تصنعى نبضه .. ودقة حبه ..
وعمره الجاى ..
شوفتى ازاى ؟؟؟ ....

طارق المملوك
22/9/2006