شريط اخبار شخبطة ملوكى

الأربعاء، ديسمبر ٢٠، ٢٠٠٦

..الاهلى و الكاس .. وجمال و الوزير ..

..الاهلى و الكاس .. وجمال و الوزير ..
******
ما حدث فى القاهرة امس لا يمت باى صله لما حدث فى اليابان منذ عدة ايام ، ما حدث فى اليابان فعلا انجاز وتقدم حضارى و تعبير عن تقدم شعب رياضيا ، ولكن ما حدث فى مطار القاهرة و شوارعها امس هو اقصى ما كنت اتصوره من قصور و ردة حضارية غريبة لم اكن اتوقعها ابدا.
اولا : لا اعرف الصفة التى اتخذها السيد جمال مبارك فى استقباله للفريق كان تحت اى مسمى ، ابن الرئيس ولا رئيس لجنة السياسات بالحزب الوطنى ولا مواطن عادى ، جميل ان يكون من العائله المالكة قصدى من ابناء الرئيس من يحب الرياضة و يؤازرها و يشجعها ، جميل جدا و جميل اكثر لو كان لذلك صفة رسمية يعنى الراجل لو بيحب الرياضة و وزير الرياضة يقدمه على نفسه فى استقبال البعثة وهو مالوش صفة رسمية تجعله مقدما على الوزير يبقى دى مصيبة بجد ، طيب ما لو بيحب يلعب كورة مايعمل زى ابن القذافى كان رئيس اتحاد الكوره وبلد ابوه بقى يعمل اللى هو عاوزه.
ثانيا: اول مرة اعرف اننا شعب هايص كده واننا شعب فاضى للدرجة دى منظر الشوارع و الناس المترصصه على جانبى الطريق فى عز الضهر ، اينعم الناس عاوزه تنبسط و الانجاز فرحهم بس كان ممكن يتعمل الشو الجميل ده فى استاد النادى و الاوتوبيس المكشوف اللى لف الاستاد و يحيوا الناس و الناس تفرح بيهم بالليل ، حتى الاعبين يروحوا على بيوتهم يشوفوا اهلهم و عيالهم الاول مش غصب و مش اجبار انهم يشوفوا اهلهم فى المطار و يسيبوهم يورحوا النادى ، اينعم الفلوس تعمل اكتر من كده لان الناس الغلابة دى هما اللى فاتحين بيوت الباشوات اللاعبين بس برضه فيه اصول...
ثالثا بقى عاوز اعرف السيد مساعد وزير الداخليه بيتكلم ازاى؟ يعنى ايه يوافق المذيع على ان اللى حصل من ترتيبات الاستقبال هو مظهر حضارى سعدنا به ، مبدئيا ماشوفتش اى مظهر حضارى الا اذا كان حبس الناس ورا اسوار المشاه وفوق كبارى المشاه مظهر حضارى والا اذا كان ترصيص الجنود من صباحية ربنا فى الشوارع يبقى مظهر حضارى والا اذا كان تعطيل مصالح الناس و قفل الطريق على الناس وحبسهم فى سياراتهم عشان الباشوات بتوع اليابان يروحوا فى طريق مفتوح و مفروش بالورود من المطار للجزيره ومحدش يضايقهم طبعا جايين من سفر ة تعبانين لازم نريحهم والناس تستقبلهم من على باب الطيارة و نفتحلهم قاعة كبار الزوار و التليفزيون و الفضائيات و الجرائد و المجلات و البوتجاز يروحوا يستقبلوهم و ياخدوا منهم احاديث صحفية و يقعدوا يعيدوا و يزيدوا نفس الكلام لمائة صحفى و مذيع ولازم كل واحد يتكلم كل لاعب و ادارى و مدرب لازم يقول حاجة ، كمان بمناسبة تصريحات السيد مساعد الوزير يعنى ايه المظهر الحضارى ده كان اهم اولويات الوزير لما وضع الخطه؟ يا نهار اسود هو اللى حط خطة الاستقبال الاسطورية دى؟ وساب البلاوى اللى فى الشارع و الخناقات و البلطجية و المجرمين و الارهابيين و الناس اللى طايحة فى خلق الله و بتبيع و تشترى فيهم و الناس اللى مقضينها محسوبيه و رشاوى و الاكراميات اللى ماليه البلد فى المرور و الجوازات و بطاقة الرقم القومى و مخلفات العربيات و التراخيص و تراخيص البناء و السرقة اللى عينى عينك و فضى خالص لموضوع استقبال فريق و ياريته الاول ده التالت.
والله مش لاقى الا حسبي الله و نعم الوكيل ، نعم حقق الفريق انجازا و لكنه ليس اسطوريا الا اذا اعتبرنا ان فوزه على بطل المكسيك اعجاز والا اذا كان ظهوره بمظهر مشرف فى مباراه بطل البرازيل انجاز طيب ماهو قبل كده فاز على ريال مدريد محدش يعنى قال انه اعجوبة و احد عجائب الدنيا الحديثة.
المعقول يا ساده انه يستقبل استقبال بسيط من الوزير و رئيس الاتحاد و اعضاء مجلس ادارة النادى ويروح كل واحد على بيته يشوف عياله و يقعد معاهم مش برضه دول بنى ادمين؟ وتانى يوم يتعمل الصبح مؤتمر صحفى يحضره كل اللاعبين و الجهاز و يقولوا كل اللى فى نفسهم وممكن بالليل يفتحوا الاستاد ببلاش فى التكرين يسبقه احتفال بسيط و خلصت هى مش حدوته ومصالح ووقت الناس مش لعبه
ربنا يهدى
******
طارق المملوك
20-12-2006
******

ليست هناك تعليقات: