شريط اخبار شخبطة ملوكى

الأحد، مارس ٠٤، ٢٠٠٧

شخبطة ملوكى / الاعلام و الحكومة .. بأسنا بيننا

شخبطة ملوكى / الاعلام و الحكومة .. بأسنا بيننا
*****

بعد القرف اللى بنشوفه فى الاعلام والرداءه و السقوط و العرى و القرف يطله واحد بارم ديله يقولك الاعلام المصرى الوهابى
بالذمة يبقى بيشوف ايه ده ولا بيفهم ايه ؟
اعتقد ان فيه نوعيه مغيبة باصطلاحات و تعبيرات هما شايفينها كلام كبير وعاوز يتمنظر على اهلينا بكلمتين سمعهم على القهوة
بالذمة لو الاعلام الوهابى كده كان من يسمونهم مثقفى مصر الكوليشن كان كانوا بقم وهابيين من الصبح
والله الواحد احتار ومابقاش عارف الناس دى جاية منين
دماغهم دى متركبة شمال ازاى وبيفسروا الاشياء منين و فين الدلائل و التفكير العلمى اللى بيتشدقوا بيه فى الرايحة و الجاية
والمنظرة الفارغة و النضارات كعب الكوباية و الكتاب اللى تحت باطهم او الفرشة و الالوان دى لزوم المنظرة و الفشخرة الكدابة
والله الواحد بقى حاسس انه عايش فى بلده مع عصبة من المعتوهين يطلقون على انفسهم الالقاب بمزاجهم
و يخطبوا و يصقفوا لبعض فى الفاضية و الفاضية لانى مش شايف مليانة فى كلامهم ابدا
كلام خايب و ماسخ و مالوش اى طعم ولا لون ولا ريحة وقال ايه مثقفين
ملعون ابو الثقافة و الريادة اللى مبنية على حقد وتربص بالاديان و الشرائع و القيم و الاعراف
ملعونة الحكومة اللى بتبيع الدين و البلد و الناس و الغلابة
ملعونة الف مرة طالما فيه عسكرى لسه مضرب عن الطعام لانه مش عاوز يحرس سفارة بلد نجسة قلت مننا مئات الالاف ظلم و غدر و عدوان بما لم ينزل الله به من سلطان
ملعونة الف مرة حكومة ترضى بينها بواحد علمانى سب المحجبات و المشايخ و عادات الاسلام
ملعونة لما ترضى ان واحد يقتل الف نفس بدون حق و يعيش يتمتع بملياراته
ملعونة الف مرة لما تهيص و تصقف و تفرح بكاس كورة و الناس بتبكى فى عز الليل و البرد بياكلها السمك و محدش اتحركلهم
ملعونه لما ترضى ان كام واحد من اياهم يتحكموا فى الاسواق ويصبح الاحتكار هو المباح فى الحديد و الاسمنت و العربيات و الاعلام و حتى ماتشات الكورة
ملعونة لما اشوف من الساعة 6 الصبح النسوان واقفه على باب الافران البلدى مستنيه لقمة ولا الخرسانة المسلحة تسد بيها جوع اسرة بحالها
ملعونة لما تسكت على مطاعم بتبيع للناس الفاسد و الغير صالح من الاطعمة و تزيد فى جشعها و ثروتها
ملعونة لما تبهدل ناس متغربة و تقرفهم من اول ما تحت رجليها فى وطنها
عارفين يعنى ايه وطن يعنى الواحد بيستنى يتاخد بالحضن يشعر بالدفا و الامان و الحميمية
الصدمة اصبحت سمة البلد و الصدمة تلو الصدمة خلت الناس تتيس و تتنح و مايحوقش فيها اى حاجة
الحكومة بتسقى الناس المر اللى يتول و يخليها تدروخ و ماتعرفش تقول كلمتين على بعض
بتسقيهم المسكر من التعليم و الاعلام و الثقافة وتربيهم على الخضوع و الخنوع و الذل و المهانه
ولا الصهاينة يا جدعان و الله الصهاينه ساكتين علينا لاننا بنعمل اللى مش هايعرفوا يعملوه لو احتلونا
لانهم عارفين انهم لو احتلونا هانفوق و هما مش عاوزين ده

ففي صحيح مسلم أن رسول الله (صلى الله عليه وسلم) أقبل ذات يوم من العالية حتى إذا مر بمسجد بني معاوية دخل فركع ركعتين، وصلينا معه، ودعا ربه طويلاً، ثم انصرف إلينا، وقال: "سألت ربي ثلاثاً فأعطاني اثنتين ومنعني واحدة، سألته أن لا يهلك أمتي بالسَنة (القحط) فأعطانيها، وسألته أن لا يهلك أمتي بالغرق فأعطانيها، وسألته أن لا يجعل بأسهم بينهم فمنعنيها".

اللهم يارب ارفع مقتك وغضبك عنا
*****
طارق المملوك
4-3-2007

هناك ١٤ تعليقًا:

غير معرف يقول...

عندك حق يا طارق فى كل اللى قلته ، هو الاعلام لو وهابى كان هيبقوا فرحانين قوى كدة فى مهرجان القاهرة السينمائى الدولى بفاروق حسنى و يسقفوله بال 10 دقائق بعد مرور يومين او تلاتة على تصريحاته، و لا كنا هنشوف اللى بنشوفه ده ، اعتقد ان لو أى حد عايز يتعلم ازاى يتخلى عن الاخلاق و المبادئ يتابع شوية الاعلام...

و فعلا هى ملعونة علشان اللى انت قلته و علشان مليون حاجة و حاجة ، علشان الضرب على القفا و علشان التعليق على الكرسى و علشان كل اللى حاول يتكلم و اتسحل و علشان ناس مطحونة مش لاقية حتى الفلوس اللى تخليها تقف فى طابور العيش ، اما عن كلمة وطن ، اعتقد ان الكلمة دى اتمسحت من المعجم المصرى و مفيش حد حاسس بيها خلاص ، ِ
واقع مرير اصبحنا نعيشه ، مش عارفة اذا كان فى امل ولا لأ بس اتمنى انه يتغير قبل فوات الاوان مع انى اتقد انه فات خلاص.

غير معرف يقول...

ملعونة طبعاً
طارق ..
إحنا مفتقدين الإخلاص في البلد دي لدرجة تخوف
احنا بنبيع بعض و بنقبض التمن و بنكمل طريقنا و مش بنفكر حتى اننا نبص لورا بصة كدة حتى
دي منتهى البشاعة و الجشع
و زي ما باكينام قالت خلاص دة واقع انا نفسي نغيره
مش عارفة ازاي و كل الناس خايفة من التغيير
حاجة صعبة اوي

Rania Lelah يقول...

استاذ طارق
انا زورتك اكتر من مرة بس دى اول مرة اكتب تعليقى
بصراحة اما كتبت الموضوع بتاعى بصيت من ناحية واحدة و هى ناحية الاعلام و الى بيعملوه فينا
انما انت اما كتبت موضوع نظرتك كانت اكثر شموليه اتكلمت عن الاستفزاز عموما الى بيحصل فينا
يارب يهدنا كلنا
امين

قاسم أفندي يقول...

مش آمين طبعا
يهدنا ايه بس يا شيخة حرام عليكي
:)))
متنسيش الياء تاني وخصوصا في الدعاء أصلها تفرق معايا كتير
:))
شكلي مستقصدك في الاخطاء الأملائية صح؟
الا بصحيح انتي كنتي جايبة كام في املاء تالته أول؟

frozen love يقول...

اي انت عارفه طبعا في كلامك من زمان


ما احنا عشرة قديمة يا استاذنا....انا مجمد حامد..نعرف بعض من مجموعة الفاجومي البريدية

والمضحك في الامر اني زرت بلوجاتكم قبل كده بس ما كنتش اعرف اني الفاجومي ليها مدونة

اتمنى اكون معاكم بقى فيهاا

سعيد بمدونتك وبالتواصل اللي متقطعش

تحياتي

Rania Lelah يقول...

ماشى يا استاذ ايمن
شكلك فعلا مستقصدنى
على فكرة انا احتمال زى ما عملت مدونه بسببك
ابطل كتابه بردة بسببك
مرسيى تانى
اظن هتبقى فرحان قوى صح؟
و ربنا يهديناااااااا

غير معرف يقول...

يا اخي دوختني وراك
بقالي سنة من ساعة ما قريت قصيدة لك على مجموعة المحروسة وانا بدور على ايميلك
انا رديت على قصيدتك على مجموعة المحروسة وفيه ايميلي وياريت ترد عليا عشان نتراسل
ياريت تفتكر واحد كان زميلك في اعدادي هندسة شبرا واسمه نفس اسمك وكان بيكتب شعر زيك
واتخرج من قسم ميكانيكا

شخبطة ملوكى يقول...

باكى بجد فكرتينى باللى مايتسماش اللى معندوش دم اللى نسي قرفة و بذاءته و استقبلوه الناس ، ناس مين قصدى ال ... فى المهرجان بالتصفيق و الملابس اللى على كيفه عشان ينبسط
ماهم محاسيب الراجل يووووووووووووه راجل ايه انا الظاهر بهيس...
اشكرك

شخبطة ملوكى يقول...

انفال
مرورك اسعدنى وكلامك احزننى لانى حسيت ان الدنيا كلها حاسه بس لما بيكونوا بره
امال الناس اللى جوا مش حاسين ليه ؟
ليه مش عارفين نبدا بنفسنا لو كل واحد صلح نفسه هانصلح اللى فوق غصب عنهم لان ربنا ووعده بيقول كده
اشكرك على مرورك الذى اتمنى ان يتكرر

شخبطة ملوكى يقول...

رانيا
اشكرك على مرورك و تعليقك و معلش ماتزعليش من ايمن بيحب يهزر بس
ولا تتعقدى ولا تزعلى هو كده بيقف للناس كلها ع الواحده
يووووووووه ياما فرج الجروب عليا
مع انى لما بشوفله غلطة بقوله بينى و بينه هو كده بس مسيره يقع

شخبطة ملوكى يقول...

رانيا
اشكرك على مرورك و تعليقك و معلش ماتزعليش من ايمن بيحب يهزر بس
ولا تتعقدى ولا تزعلى هو كده بيقف للناس كلها ع الواحده
يووووووووه ياما فرج الجروب عليا
مع انى لما بشوفله غلطة بقوله بينى و بينه هو كده بس مسيره يقع

شخبطة ملوكى يقول...

ايمن افندى
يا عم انت دايما كده تقف للناس ع الواحده؟
ومين قالك انها كانت فى تالته اول معاك دى كانت معايا ف تالته تانى انت نسيت ولا ايه

شخبطة ملوكى يقول...

محمد حامد
اشكرك على مرورك و اشكر الصدفة الجميله اللى جمعتنا تانى
اتمنى الا ينقطع المرور

شخبطة ملوكى يقول...

مين طارق حمدى
يا مراحب يا مراحب بالشاعر الجميل و صديق رحلة الكفاح المسلح بالكلمة و المشاعر
اشكرك يا طارق على كلماتك و سعيد بانضمامك للفاجومى