..انا جدى كان زمان مملوك..
انا جدى كان زمان مملوك..
وكان فارس .. وكان حارس ..
وكان عادل .. وكان راجل ..
ولاكنش من اللى باعوك ..
ولا نشلوك .. ولاسجنوك ..
ولاكنش من اللى خانوك ..
ومع انه لا كان له رصيد ..
فلوس .. وصكوك ..
لكن صبح ف يوم سلطان ..
ملك الملوك ..
جاب النهار .. طرد التتار ..
نادى المنادى .. دق الطبول ..
وبعلو صوته .. نده يقول ..
ملك الملوك .. طرد المغول ..
* * * * * *
انا جدى كان زمان مملوك ..
لكن صبح ف يوم سلطان..
ملك الملوك..
لانه زمان .. كان الملوك..زينة الرجال ..
صدق اللى قال ..
اصل الملوك .. اذا حكموك ..
وكانوا تمام .خالفوا اللئام ..
ولا يخونوش ..
وانا جدى.. صحيح ف الاصل مش عربى ..
لكنه كان مسلم اكيد ..
وكان غنوة جهاد و نشيد ..
وكان دايما يعيد و يزيد ..
يكلمنى .. ويحكيلى ..
عن زمن الجدود.. و يقول ..
يرحم زمان .. زمن الجدود ..
يرحم زمان .. عهد الاسود ..
وكان يسكت .. عنيه تدمع ..
وكان يسمع ..عذب الكلام ..
حديث .. قرآن ..وصوته ادان ..
عليه الخلق تتجمع ..
حى على الجهاد يا رجال ..
اصل الزمان غير الزمان ..
مع اننا فى نفس المكان ..
لكن زمان .. زمن الملوك ..
زمن والدى ..وجدى وابوك ..
كان الملوك .. حقيقى ملوك ..
وانا فاكر زمان جدى ..
ف يوم قالى .. وفهمنى .. وعلمنى ..
ماتزعلش اذا الخلق ف يوم عايروك .
.وقالولك ..
جدك كان زمان مملوك ..
ماتزعلشي .. مسير الخلق تتعلم ..
وتترحم .. وتتمنى ..
يرجع زمان ..زمان جدك . .
زمن الملوك ..
طارق المملوك
8/4/2005
ليست هناك تعليقات:
إرسال تعليق