شريط اخبار شخبطة ملوكى

الجمعة، فبراير ٢٣، ٢٠٠٧

العنجهية المصرية .. الى اين تاخذنا؟؟؟

شخبطة ملوكى
العنجهية المصرية .. الى اين تاخذنا؟؟؟
*****
قريت مقال كده من واحد فاضى و الله مش عارف نازل شتيمه فى دول الخليج
يا عينى بتمص دم الغلابة المصريين و بتاخد شبابهم
تاخدهم لحم و ترميهم عضم
وهاتك يا تريقه عليهم واحنا اللى بنينا حضارتهم
واحنا سبب زياده سعر البترول عندهم
فاضل يقول اننا اللى رضعناهم و صدرنالهم الحضارة اللى عايشين فيها
وبيتباهوا بيها على العالم كله الان

مش عارف ليه حاسس واحنا بنخبط كده فى دول الخليج اننا ناكرين الجميل
اقول لكاتب المقال
هو حد ضربنا على ايدينا عشان نروحلهم؟
ولا احنا اللى ولاد ..... و بنقفل الرزق على البسطاء من كل حته و بنطفش كوادرنا و عمالتنا و بندلل عليهم كمان
زى ما تكون الحكومة نخاس بايع ناسه
مش عارف قبل ما نتشطر على غيرنا نلوم على حكومتنا بيعها لابناءها بابخس الاثمان
ونلوم عليها بيعها ليهم مرة تانية بعدم مساندتهم بسفارتها و قنصلياتها فى كل العالم
بس فالحين يتصوروا مع فرق الكورة و الفنانين اياهم
يا عم والنبى نتكلم عن نفسنا الاول و نشوف غسيلنا الوسخ اللى نشرناه قدام العالم كله
يا راجل ده لو واحد سايح معفن مايسواش تلاته مليم اشتكاك انك ضايقته لانتنفخ كلنا عشان سيادته
ولا لو سواق تاكسى شاف عربي معاه واحده لامؤاخذه و خدته الجلاله و الشهامه و زعق او نزله لايتنفخ فى القسم
يا عم و النبي اتباعنا فى بلدنا قبل ما نتباع بره
و كمان تعالى هنا شوف الحكومة و الداخليه بيعملوا فى المصريين ايه و بعدين هايهون عليك الف مرة اللى بيشوفه الواحد بره من الغربة
لان اللى بيتعمل فيه فى بلده مش ممكن يتعمل فيه بره ولا واحد على مليون منه

يا راجل ده الواحد محترم قوى بره و بيتعامل كبنى ادم و بياكل و يشرب و عايش فى هدؤ و نظام و نظافة مش ممكن تلاقيها فى صلاح سالم نفسه
ولا عمرنا حد لطعنا فى اشاره بالساعات ولا حاجة
ولا واحد اشتكى صاحب عمل الا و جاله حقه من غير رشوة ولا محسوبيه

مش عارف ليه حاسس بقهر اننا رغم عراقة بلدنا متخلفين حضاريا و اخلاقيا كده
والناس اللى عرفوا الحضارة من ربع قرن سبقونا بمئات السنين
زعلان على مصر قوى بجد
زعلان اننا حتى مش عارفين نتصالح مع نفسنا و نعترف اننا بقينا بعيد قوى
وخدانا العنجهية و الالاطه مش عارف هاتودينا لفين
ماهى دى اللى ودتنا ورا و خليت العرب كلهم يكرهونا ماليين الدنيا زعيق على كل واحد يتكلم و نقابله باستخفاف
ده اتعلم عندنا ، هو كان عندهم ثقافة او فن او عمارة قبل كده
ده احنا اللى علمناهم
كنا علمناهم ببلاش؟
وحتى لو ببلاش اهم فلحوا و عملوا اللى معرفناش نعمله
ماهو طول ماحنا مش معترفين اننا بقينا فى ذيل قائمة الدول المتحضرة عمر ماهتقوملنا قومه تانى

يا عم و النبى سيب الناس فى حالها وشوف بلاوينا احنا الاول
ولا احنا بس اسد على وفى الحروب نعامة

يا ساتر طهقت و الله
*****

طارق المملوك
23-2-2007

هناك ٥ تعليقات:

قاسم أفندي يقول...

والله يا طارق كلامك سليم مية في المية ومن زمان كان نفسي اتكلم عن الموضوع ده لأن للأسف الناس دي سبقتنا بمراحل وانت عارف ان المشكلة مش فلوس وبس وكلنا عارفين دبي وعارفين مواردها
للأسف معاك حق
أشكرك علي هذا المقال الرائع

شخبطة ملوكى يقول...

اخى العزيز ايمن
يسعدنى دائما مرورك و يسعدنى اكثر ان تشارك بالموضوع.
اعتقد ان الموضوع خطير فعلا و يجب دراسته و مناقشته بطريقى اوسع و اكبر
فهل تجعلها دعوة؟؟؟
اتمنى

غير معرف يقول...

ايوة بالظبط ..
على فكرة انا بذلت جهد مرير في ايجاد مصطلح يطلق على هذا التصرف :)
تصدق ماكنتش اعرف ان دي اسمها عنجهية ؟
باتكلم جد..!
فعلا ماكانش عندي فكرة !!
الشعب المصري متفرد في حاجات كتير اوي اوي حتى عيوبنا تحس انها بتاعتنا لوحدنا كدة
:)
سعيدة بالمرور من هنا بجد
شكرا

شخبطة ملوكى يقول...

مفاجاة جميلة مرورك يا انفال
كويس انك كمان متفقه على الموضوع ده لانه مارقنى جدا و عندك حق جدا فى اكتشافك ان عيوبنا خاصة جدا زى ما مميزاتنا خاصة جدا برضه
اشكرك يا انفال على مرورك الذى انتظره مرات و مرات

Shaker Shaker يقول...

Sadaqt jazak allah kheer