شريط اخبار شخبطة ملوكى

الجمعة، فبراير 16، 2007

شخبطة ملوكى .. محاولة التوريث للعريس

شخبطة ملوكى .. محاولة التوريث للعريس
*****
نشرت صحيفة الاهرام القاهرية صوت الحكومة الجهورى خبرا اعتقد انه مفبرك الى اقصى الحدود.
قال ايه الاخوان كانوا بيخططوا لتظاهر بالملابس شبه عسكريه و مش عارف ليه شبه عشكرية و ماقالوش ليه عسكرية و نخلص هو الكلام عليه جمرك؟
وقال ايه بقى الملابس دى شبه ملابس الحرس الثورى الايرانى و حزب الله و طبعا من هنا يفهم ان الاخوان هايواجهوا تهمة التمويل من الخارج
وقال ايه كمان بقى لقوا اسلحة بيضاء و طبعا الكلام ده مايخيلش على عيل صغير قال يعنى الاخوان هما البلطجية ، طبعا فاكرينهم لما وقفوا يوم الانتخابات و قتلوا و روعوا الامنين عشان بتوع الحزب الوطنى يخافوا و مايروحوش الانتخابات
و طبعا الاخوان كمان مزورين و هما اللى زوروا الانتخابات بقى بالمرة عشان التهم تبقى كاملة امال مش هما اللى اصابوا الشارع المصرى كله و المسيحيين بالخصوص بالرعب ؟ دول دمويين بصراحة و الحكومة مش عارفه تعمل فيهم ايه.
حسبي الله و نعم الوكيل التصعيد كان نتيجته القبض على 78 عنصر من عناصر الاخوان قال يعنى الحكومة كانت مستنية ماهى مالية المعتقلات بقيادتهم و شباب الجامعات المنتمين لها.
انا شايف ان المرشد الدور قرب عليه قوى عشان هو بيهدد وراثة المحوس للكنبة اصل مصر مابقاش عرشها كرسي العرش بقى كنبة عشان تعرف العيله كلها تقعد عليه و لزوم التوريث اللى كلنا شايفين ملامحة بتتحدد يوم ورا يوم
الاخوان هما الهم التقيل اللى قابض على مراوح العيله المالكة و كل اللى عاوز يهيص فى البلد و يقلبها قردخانه لانهم التيار الاسلامى الوحيد اللى ممكن يحافظ على التواجد و المطالبة بدولة يكون فعلا اساس التشريع فيها الدين و تطبيق التعاليم الاسلامية يبقى مكفول و مايتحاربش زى الحكومة النظيفة قوى دى مابتعمل
طبعا المخطط ده ماشي موازى معاه صفقة بتحاول الحكومة تخلصها من سكات وهى صفقة الافلااج عن الاستاذ ايمن نور مع وعد منه انه مايدخلش الانتخابات الجاية عشان المحروس يعرف ياخد الكنبة و ابقى حلنى بقى لو حد عرف يقومه من عليها تانى كانت نفعت مع ابوه اصلا الحكاية دى
طبعا هايطلعلى واحد يفكر انى اخوانى عشان كده بدافع عن الاخوان و هايطلع واحد ليبرالى يقول انى انا ليبرالى عشان اتكلمت على ايمن نور
و الصراحة راحة يا روحى وانت مابتعرفش ، انا لا اخوانى ولا ليبرالى انا كل اللى طالبه ان البلد تبقى بدون وساخة ، ولا وساخة سياسية ولا وساخة اخلاقيه وده مش هاييجى من وجهة نظرى مع اى نظام يكون امتداد للى موجود دلوقتى
يعنى بالمختصر المزيد انا عاوز حكم جديد واول ما يمسك يحاسب كل اللى حكموا البلد قبل كده و لسه عايشين ان شا الله لو كان بيحكمها من ايام الملك و مش شرط يعنى يعاقبوه بالرجم او الاعدام كفاية الفضيحة على الملا و ممكن ننفيه بتهمة الفساد فى الارض عشان منظمة حقوق الانسان ماتألبش العالم على الحكومة الجديدة من اولها
كمان عاوز حاجة عاوز اقول بس مش عارف الناس كلها اكيد هاتسيب اللى كتبته كله و تمسك فيها بس هاقول هو انا بخاف
انا عاوز نظام اسلامى حقيقى على سنة رسول الله و الخلفاء الراشدين من بعده عشان نقدر نتقدم و نقوم تانى نبقى لينا قيمة ربنا هو اللى قال كده مش انا يا جماعة ربنا قال ان تمسكنا بشرع الله و اوامره هى السبيل الوحيد لنصرة الله لنا
مش كده ولا ايه....
******
طارق المملوك
16-2-2007

هناك تعليقان (2):

الحقيقة غايتنا يقول...

كلمك حكم بجد الموضوع ممتاز تمني المتابعة

شخبطة ملوكى يقول...

الاخ العزيز اين هى الحقيقة
اشكرك لمرورك و تعليقك الذى اسعدنى و اتمنى ان اكون مستحقا له
دمت بكل الخير