شريط اخبار شخبطة ملوكى

السبت، فبراير ١٧، ٢٠٠٧

قصيدة / المحاكمة

.. المحاكمة ..
*****

مسكت ف إيدى ..
ومن بين دموعها ..
بصت و قالت .. بعنين حزينة ..
خلاص مسافر؟..
هاتيجى تانى؟..
ولا المحبة هتروح و تمشي ..
لما هاتبعد عن نيل بلدنا ..
وتروح ناسينا ..
وحبه .. حبه ..
هاتنسى إنى .. مستنياك ..
بصيت ف عينها ..
مش قادر اشوفها ..
وطيت دماغى .. ومن كسوفى ..
من كتر خوفى .. مش لاقى كلمة ..
تمسح دموعها ..
ولا عارف اطبطب على الكلام ..
ولا قادر احلى طعم المرار.. اللى ف عيونا..
مش عاوز ابعد ..
ولا عاوز اقعد ..
مش قادر افضل و اقول كلام ..
يرجعلى تانى .. واشوف سراب ..
ولا قادر امشى واقول خلاص ..
ملعون ابوها .. دى عيشه غبره ..
والكل فيها جاله اكتئاب ..
ان غصب عنى بقيت سجين ..
ف بلاد بعيده ..
مستنى يمكن تظهر براءتى ..
بحكم يمكن يكون غيابى ..
او يجيى يوم واللى حاكمنى..
اقدر احاكمه..
وازغرله جايز .. واظهرله نابى ..
واسال سيادته ..
كان ذنبى ايه لما رفضنى .. خلانى اطفش ..
كان ذنبى ايه ماعرفش اعيش ..
طالق كلابه علينا تعوى ..
عماله تقفش .. ف خلق ياما ..
والفرحة فينها؟؟.. يقول مافيش ..
كان ذنبى ايه انى اسيبها ..
واسيب حبابيبى ..
واسيب ولادى ..
اخويا اختى .. والاكتر امى ..
ازاى حالك .. صلي لى يا اما ..
آهين يا غالية .. طال الغياب ..
مستنى يوم اقدر اقوله مليون سؤال ..
واكيد ف يومها مش هالقى منه ابسط جواب ..
مستنى اشوفه موطى راسه ..
عمال بيبكى .. والكل داسه ..
زمانه راح ..
يمكن ساعتها انسى اللى شوفته ..
واقدر اقوله .. كلمة شفيعنا ..
خلاص سماح ..
*****

طارق المملوك
16-2-2007


هناك ٨ تعليقات:

غير معرف يقول...

يمكن نادرا جدا لما بعلق على قصيدة مع ان فى قصائد كتير بتعجبنى قوى بس يمكن مبقدرش اعبر عن اعجابى ده بالكلام ، و لكن القصيدة دى مختلفة، قررت ان اعلق عليها حتى لو الكلام كان مش مترابط او ليس له معنى ،بجد القصيدة تحفة ، عجبنى قوى الانتقال من وصف لقاء الوداع مع الحبيبة الى الحاكمة ، و المحاكمة طبعا رائعة، اعتقد انها بتعبر عن شعور ناس كثيرة منتظرين المحاكمة و الف واحد و واحد مستنيين يحاكموا سيادته و يسألوه

غير معرف يقول...

الشاعر الرقيق طارق المملوك
تعجبنى رومانسيتك فى جميع الاحوال
حتى وانت تتناول قضايا هامه
لاتتخلى عنها
كما رأيت هنا جاء توصيف وداع الحبيبه
والخروج من الخاص للعام
بسلاسه وانسيابيه
رائع ودوما موفق
عايده العشرى
http://bentelnile.blogspot.com

شخبطة ملوكى يقول...

باكى اشكرك على مرورك و تعليقك
بدج المرة دى مختلف
فعلا اول مرة تعلقى على قصيدة مش موضوع
عجبنى جدا دقة ملاحظتك فى النقل بين الموضوعين
اشكرك

شخبطة ملوكى يقول...

الشاعرة الجميله عايدة العشرى
اول مرور لك على مدونتى وتعليقك الجميل الواعى يمثل لى هدية رائعة تسعد القلب
اشكرك و اتمنى دوام التواصل بيننا على الشبكة العنكبوتية فى اى موقع واى زمان
اشكرك و دمت بكل الخير

قاسم أفندي يقول...

بجد حلوة اوي يا طارق

شخبطة ملوكى يقول...

قاسم باشا
كل السعاده عندما اسمع كلمة اعجاب منك صديقى العزيز
فانت صريح لاقصى الحدود ولا تعترف بالمجاملات
لذلك كلماتك وسام على صدرى
اشكرك اخى الحبيب

Unknown يقول...

شعرك حلو قوى

شخبطة ملوكى يقول...

ابو امل
تعليقك البسيط و الرقيق فى ان واحد اسعدنى كل السعاده
شكرا لك اخى الحبيب