شريط اخبار شخبطة ملوكى

الجمعة، نوفمبر ٠٣، ٢٠٠٦

قصيدة / قلبى .. ووعدى ..

قلبى .. ووعدى ..

قبل ما اشوفك ..
عمرى ماشوفت الشمس تشقشق ..
جوا حياتى .. تنور عمرى ..
عمرى ماشوفت نجوم الليل بتلالى ف عينى ..
وتنده قمرى ..
عمرى ماشوفت الفرحة بتمسح ليل احزانى ..
وتدفينى .. و تهدينى ..
لما تطبطب .. بتنسينى ..
حزنى الساكن جوا ف قلبى ..
حبك يسرى ..
عمرى ما شوفت الدنيا بتضحك ..
تخلق شوق وسعادة .. وفرحة ..
تتفتحلى .. بكل ببانها ..
لما راح اجرى عليها وابوسها ..
عمرى ما شوفت ف ليلى الحلم ..
بيتبسم لى ..
ويصبح عمرى معانى جديدة ..
وفرحة كبيرة .. بتتقسم لى ..
عمر ماشافها الكون ف زمان ..
نفسى العالم كله يشوف
ويحس معايا باحلى امان ..
مهما الدنيا دى راح تتعبنى ..
ويا الحب ده راح اتحمل ..
كل الشقا .. وطريقى معاكى
بفرحة يكمل ..
شوفت السما .. بتدارى علينا ..
وبتخبينا ..
جوا سحابه حب سفينة ..
ترحل بينا ..
بعيد وحدينا ..
وتمطرنا دموع م الفرحة ..
عمرى ما كنت أصدق بيها ..
ايه غيرنى ..
وخلى اللوحه الابيض و الاسود ..
تبقى جناين م الالوان ؟؟ ..
ايه خلانى احسن معاكى كأنى بطير ..
ومعاكى أمان ؟؟ ..
ايه غيرنى من جوايا ؟؟..
وخللى الدنيا تعيش ف سمايا ..
ورود تتفتح ..
وارجع احس العسل الصافى ..
يبل شفايفى ..
كنت انا حاسس انى غريق ف بحور الدنيا ..
والامواج قدامى .. وخلفى ..
وانتى سفينة عمرى .. تاخدنى ..
تبحر بيكى ..
لما الخوف بيطارد حلمى ..
تاخدنى عنيكى ..
دنيا بتكشف سر السحر الساكن فيكى ..
دنيا خدتنى ..
ومن احزانى ..
بعيد ودتنى..
لحدك .. عندك ..
تخطف منى الالم الساكن ..
وترجعلى البسمه الغايبة ..
ف ليلى الداكن ..
ايوة معاكى .. انا هابقى واكون ..
لمسه ايدك .. تبقى طبيبي..
خليكى جنبى ..
قلبك حضنى ..
هو حبيبي ..
انتى يا احلى ملاك ف الكون ..
خليتى قلبى بلمسة ايدك ..
زى الكنز .. دهب و ياقوت ..
بعد ما كان متغرب تايه ..
كاتب اسمه بحرف الموت ..
هافضل احبك ..
بعد ما حبك فك طلاسم ..
قلبى و قلبك ..
نفسي ارسملك بسمه رقيقة ..
زيك .. نفسك ..
وسط شفايفك ..
وانت هناك تستنى اجيلك ..
انزل بحر و اعدى جبال ..
واشرب من نيلك ..
ده انتى الحلم الساكن فيا ..
ومستنيه .. يمكن يتحقق ..
اسكن حضنك ..
وتخبينى ف نبضك .. قلبك ..
يرحل خوفى لما اجريلك ..
وابقى ف دمك ..
هو ضمانى ان افضل جنبك ..
و انتى اميرتى ..
وانت النور الطالل ليا ..
وانت نجومى ..
قمر لياليا ..
يمسح دمعة سواد ف جفونى ..
بتعمى عيونى ..
ويرجعلى بفرحة .. جنونى ..
كنت بدور عمرى عليكى ..
وسط عيون و وشوش وقلوب مستنى عنيكى ..
ياما خدتنى عيون صياده ماليها الزيف ..
بس حقيقة حبى خدتنى ..
وويا ربيعك .. عدى خريف ..
مهما قالولى وسيم ده عشانك ..
مهما قالولى كلامك ورد ..
اقول بستانك ..
والالوان الساكنة عيونى ..
دى لون فستانك ..
انا كده عايش بس عشانك ..
ده انتى النفس اللى بيحينى ..
وانتى الماضى .. بكل براءته ..
وانتى الحاضر .. عيشته .. لحقته ..
والمستقبل بس عشانك ..
مستنينى ..
كل ده منك .. وانا مش قادر ..
الا اديكى ..
قلبى .. وعدى ..
بانى اكونلك ..
وافضل احبك ..
قولى جوابك .. راح يرضيكى ..؟؟؟؟

طارق المملوك
2-11-2006






هناك تعليقان (٢):

غير معرف يقول...

وتبقى اشعارك الرقيقه ياطارق بما تحمل من صدق الاحساس وجمال التعبير
النقطه المضيئه عندما تظلم الدنيا
الامل فى وجود الخيرعندما يسود الظلم والجهل
نسمه نديه فى عز الظهر
سعدت بوجودى هنا
الف شكر

شخبطة ملوكى يقول...

اختى العزيزة الشاعرة الرقيقة عايدة العشرى
كلمات تضيئ مدونتى من شاعرة اعتز بقلمها و بثناءها لانها شاعرة واعية محترفة تقدر الكلمات و المعانى
اشكرك اختى العزيزة